Kum khat chuang hnua hripui vei Enkawl lai an tlem ber ní a thleng

May 4, Nilaini khan Mizoramah Covid-19 vei mi 45 hmuh chhuah a ni a, endik zat aṭanga hmuh zat (positivity rate) 7.05% a ni. Nimin khan hripui vei dam tawh mi 104 chhuahtir an ni a, Covid-19 vei thi an awm lo a; nimin kha kum khat chuang hnua hripui vei enkawl lai an tlem ber ni a ni.

Nilainia hripui vei hmuh chhuahte chu mipa 19 leh hmeichhia 26 an ni a; RT-PCR hmanga hmuh pahnih leh RAT hmanga hmuh 43 an ni. Positive hmuh thar mi 45 zingah district khawpuia mi 10 an tel a, a bâk zawng chu district khawpui pawn lama mi an ni.

IDSP record angin, Mizoramah Covid-19 vei 2,27,645 hmuh chhuah a ni tawh a, mipa 1,06,001 leh hmeichhia 1,21,644 an ni a, mipa aiin hmeichhia 15,643-in an tam zawk. Nimin tlai dar 5 thleng khan mi 2,26,644 (99.56%) chhuahtir an ni tawh a, mi 697 (0.31%) thi tawhin, enkawl mek mi 303 (0.13%) an awm.

Nimin tlaia Covid-19 positive enkawl lai awm zat mi 304 hi kum khat chuang hnua Mizorama active case a tlem lai ber a ni a, April 16, 2021 tlaiah khan active case 253 awmin, April 17, 2021 aṭang chuan active case 303 aiin a tam char char tawh a ni.

Nimin tlai dinhmun angin, Mizorama district zawng zawngah Covid-19 positive inenkawl lai mi 100 awm tlinna a awm rih lo a, enkawl lai tamna ber Aizawl district-ah mi 96 an awm. Siaha, Lawngtlai, Kolasib, Hnahthial leh Champhai district-ah positive enkawl mek mi 10 aia tlem ṭheuh an awm a ni.

Kum 2011 chhiarpui aṭanga chhûtin, Mizorama Covid-19 vei hmuh tawh 2,27,645 chu mi 1,000 zelah hripui vei mi 207 an awm ang a ni a; mi 1,00,000 zelah Covid-19 vangin mi 63 an thi tawh ang a ni tih sorkar thuchhuakin a tarlang.