MG Road kawngpui a khîk belh zel
Aizawl Circuit House hmun hluia State Convention Centre sakna tur laih hnua a chhak lama lei khi chu a khîk belh zela hriat a ni a, Upper Khatla lam, MG Road-a Bible House kawt vela khi pawh a khîk belh zel.
MG Road kawngpui lai taka khi hi nikum December thla tìr lam khan a lang ṭan a; lei khi hi December 8, 2016 zing khan UDPA minister Zodintluanga leh department hotute leh Geology & Mineral Resources department mithiamte'n a en. Minister chuan hna thawh mek chu chawlhsan rih turin a hriattir nghal a ni.
Bible House-a awmte chuan, an building dinna chu nikum lama lirnghing na berah tlemin a khî a, a hnua lirnghing lehah tlemin a khîk belh bakah, a thlanga State Convention Centre sakna tura lei laih hnuah a khîk belh leh niin an lo sawi tawh a ni.
Lei khì vang hian MG Road-ah hian truck rit phurte chu hun eng emaw chen tlan phal a ni lo a, tunah erawh chuan an tlan leh tawh nia thu dawn a ni.
Hetih lai hian, Traffic SP chuan nimin khan thupek chhuahin, MG Road kawngpui a khîk belh avangin 407 (truck) chin chung lam, rit phur leh a ruak, chhim lam pan tur reng reng chu Treasury Square aṭangin Upper Republic kawng lama kal turin a hriattir. Hei hian city bus service-te erawh a huam lo.
Traffic SP thupek chhuah danin, lirthei lian (HMV)-te Upper Republic Kawng lama kal tur a nih avang hian truck-te Aizawl khawpui chhunga an luh theih hun, zan dar 7 aṭanga zing dar 7 inkarah Treasury Square - Sikulpuikawn via Upper Republic kawngpui sirah lirthei dah phal a ni lo. He thupek hi vawiin aṭanga hman ṭan nghal tur a ni a; chhiatrupna thil, kângmei leh rîkrum kaihhnawiha duty leh dan leh thupek pawimawh bika duty-te chetvelna a huam lo.