ILP pek chhuah dan a awlsam lutukin hria

Central YMA hnuaia Legal Sub-Committee member-te nimina Central YMA pisaa ṭhukhawm chuan, Inner Line Permit (ILP) pek chhuah dan chu a awlsam lutuka an hriat avangin, a ṭul anga hmalak an rél.

Kum 2016-a CYMA rorel inkhawm neih ṭuma 'ILP chung­changah sorkarin mumal zawk a kalphung thar a siam theih nan hmalak ni rawh se' tih an rel bawhzuiin CYMA Legal Sub-Committee-te hi an ṭhukhawm a; ILP pek chhuah kawngah leh ILP dan bawhchhiate hremna mumal tak pek an ni lo nia hriat a nih thu an sawi.

DC office hrang hrang leh Mizoram House aṭanga ILP pek chhuah dan awlsam lutuka hriat a nih thu sawi lan a ni a, hemi chungchang hi ILP guideline siamtu Home department leh ILP pe chhuaktu DC office-te sawipui an rêl a ni.