KHAWTHLIR

Signature campaign
UPC (NEI), North Mizoram District Thiang­hlimna Committee-te January 12, 2017-a ṭhukhawm chuan, naupang sunday school leh PYD-ahte zûk leh hmuam bakah, thiang­hlim lo leh bawlh-hlawhna hrang hrang laka inthiarfilhlim tura intiamkamna signature campaign neih an rel.

Mamitah training
Nimin khan Mamit DC conference hall-ah 'Digital Financial Inclusion Training' buatsaih a ni a, DC Lalbiaksangi'n a hmanpui. Mamit DC chuan, sorkar laipui hmalakna cashless/digital programme chu an district-ah mipuiin an chhawr ṭangkai ngei a beisei thu a sawi.

Lawmman lawm
Swachh Bharat hnuai­a state pum huap damdawi-in fai inelna, Kayakalp 2016-a lawmman pathumna latu Kolasib District Hospital chuan nimin khan an conference hall-ah an lawmman dawn an lawm a, Kolasib DC H Lalengmawia'n a hmanpui. Kolasib District Hospital hi kum 1896-ah din a ni a, khum 60 awm­in, doctor 12 an awm mek a ni.

Eng awm dawn lo
Power & Electricty department thuchhuah tarlan danin, vawiin zing dar 9 leh tlai dar 4:30 inkarah 33kV Indoor Sub-Station, Aizawl châwmtu 33kV line hrui lian zawk thlak hna thawh chhunzawm a ni dawn. Hna thawh chhungin Electric Veng, Dawrpui, Zarkawt, Tuikual South ṭhenkhat, Treasury Square, Chanmari, Chaltlang Dawrkawn, Ramhlun PWD Mual, Ramhlun Venglai leh Ramthar Tlangveng ten kawlphe­tha an nei dawn lo.

Hnathawh thlirlet
Environment, Forest & Climate Change department chuan nimin khan PCCF conference hall-ah 3rd Quarter Review Meeting an nei. Ram-ngaw, nungcha leh environment pumpui venghim turin thing phun leh enkawl zui te, mipui, tlawmngai pawl leh khawtlangah zirtirna pek leh thawhho a ṭul thu an sawi a; tunlai thiamna hmang uar lehzual turin thutlukna an siam.

Kuthnathawktute Ni
January 14-a hman ṭhin, 'Kuthnathawktute Ni' chu kuminah Inrinni-ah a tlak avangin Mizoram sorkar chuan January 19, Thawhlehnia hman turin a ruahman.