US Ambassador-in Larsap leh CM a kâwm

US ambassador to India Richard R Verma chuan Ningani tlai khan Governor Lt.Gen. Nirbhay Sharma a kâwm a, zanah chief minister Lal Thanhawla a kâwm leh a; thil pawimawh hrang hrang a sawipui.

Larsap nen Raj Bhavan-a an inkawmnaah Richard Verma chuan, Mizoram chu state rálmuang ber leh inremna thuthlung ziah hlawhtlinna ber state a nih thu a sawi.

Larsap chuan, Mizoram Peace Accord hlawhtlin chhan chu a ram mipuite ṭanrualna vang a ni tih a sawi a, "Mizo khaw­tlang inenkawl dan te, kohhran leh tlawmngai pawlte hnathawh dante a fakawm hle a ni," a ti.

India leh ṭhenawm ram Myanmar leh Bangladesh-te chu hmasawnna kawng hrang hrangah thawhhona ṭha an nei chhoh avangin nakin lawkah chuan Mizoram chu sumdawnna hmun pawimawh leh Asia chhim chhak lam ram kawngkapui ber a nih a beisei thu sawiin Governor chuan, USA-in a bik takin zirna leh hriselna, skill development leh ruihlo dona kawngah Mizoramah hma la se a duh thu US palai a hrilh.

CM Lal Thanhawla chuan, US Ambassador hi Mizoram leh Mizo mipuite'n remna leh muanna atan kawng an zawh dante a hrilh a, "Kum 20 buai hnuah tunah chuan Mizoram chu India rama state rálmuang berte zinga a mi a ni," a ti.

Richard Verma chuan, Mizoram chu state nuam tak a ni tih thua a lo hriat ṭhin chu a taka a hmuh thu sawiin, Mizorama a rawn zin chuan nakina zelah Mizoram tan rah ṭha a chhuah a beisei thu a sawi.

Richard Verma hian Ningani vêk khan Excise & Narcotics department hotute chu an secretary Benjamina hoin an pisaah a kâwm a; ruihhlo tawlhrûk dona leh a zuartute hmachhawn kawnga USA leh a thawhpui hmalaknate an rawn belhchian thu a hrilh.

US palai chuan, Excise & Narcotics department leh Drug Enforcement Administration (DEA), USA ten thawhhona ṭha tak an nei tawh chu lawmawma tih thu sawiin, Mizoram kal­tlanga ruihlo tawlhrûkte man chhuah a nih zel theih nan END-te chu ṭan la zel turin a ngen a, "END nen thawhhona kan chhunzawm zel ang a, intahhriam nan training exchange programme nei turin hmalak a ni ang," a ti.

END secretary Benjamina chuan an department hmalaknate tarlangin, ruihhlo do kawngah ṭhahnemngaih a nat thu leh thawktu an indaih loh thu a sawi a; Mizoramin international border a neih thui avangin hna a hautak bik thu te, Myanmar nena thawhhona neih an tumte chu tun thlengin Myanmar lam aṭangin ṭawiawmna a ṭhat tâwk loh thu te, misualte bei lêt turin training ṭha zawk leh ralthuam ṭha zawk an mamawh thute a sawi bawk.

US ambassador Richard R Verma hi Ningani zan khan Chief Minister-in zanriah a buatsaihsak bakah cultural programme a buatsaihsak a; nimin chawhnu khan Mizoram a chhuahsan a ni.