Hmasawnna hna thawh tur sawiho

UDPA minister Zo­dintluanga hoin, nimin khan a pisaah sorkar official leh company hotute'n meeting chhâwng hnih an nei a; hmasawnna hna thawhna tur project pa­hnih an sawiho.

Meeting hmasa zawkah Aizawl khawpui chhunga streetlight chhit mek leh thawm ṭhat loh 5,741 chu kawl­phetha renchem zawka chhit theih LED light hmanga thlak vek dan tur sawiho a ni.

Energy Efficiency Services Ltd. (EESL) aiawhin a lem nen plastics waste to hydrocarbon conversion plant a sawifiah a, hmalak zui tan dan tur an sawiho nghal. Thawhhona thuthlung mumal tak duang turin Power & Electricity department leh EESL chu mawhphurhna pek an ni.

Meeting-a tarlan a nih danin, tun dinhmun­ah Aizawl khawpuiah kawlphetha watt 250 hmang HPSV 2,500 leh watt 80 hmang CFL/ICL/tubelight 3,241 chhit mek a ni. Hengte hi kawlphetha heh lo leh êng pe chhuak ṭha zawka ngaih, LED light watt 90 leh watt 40-in an thlak dawn a; a enkawlna leh current bill-a kum tin cheng nuai 190 sên ral ngai ṭhin chu LED light hman a nih hnuin cheng nuai 60-ah a tlahniam tura chhût a ni.

Meeting chhawng hnihnaah Aizawl khawpui leh Mizoram hmun hrang hranga sarâng (plastic) lam thil chhia ni khat chhunga ton 20 chuang fê tling khawm hman ṭhin, tuialhthei siam chhuahna atana hman dan tur sawiho a ni.

MK Aromatics Ltd. managing director Dr Mahesh Merchant chuan a lem nen energy plant-a plastic bawlhhlawh tuialh­thei a chantir a nih dan leh energy plant dinna tura thil ṭulte a sawifiah.

Meeting-ah hian plastics waste to hydrocarbon conversion plant sakna tura hmun dap hmasa tura hmalak phawt leh chumi hnua MK Aromatics Ltd. leh Mizoram sorkar thawhhona kalpui zel dan tur bawhzui turin thutlukna siam a ni.