BJP President-in Mizoram mamawh a thlen

BJP Mizoram Pradesh chuan thuchhuah siamin, an president Prof. JV Hluna'n tun hnai khan Durtlanga BSF Composite Hospital sawn tumna awm mek chu ṭhulh tur leh Imphal-Aizawl Air India flight tihtawp chu a ngai anga kalpui leh turin sorkar laipuiah ngenna a thlen tih an tarlang.

Mizoram BJP thu­chhuah tarlan danin, Durtlanga BSF Composite Hospital awm mek Jammu & Kashmir-a sawn tum a nih chung­changah Prof. JV Hluna chuan minister of state for Home Kiren Rijiju hnenah lehkha thawnin, "He damdawi-in hi Mizorama BSF battalion pali, Assam Rifles battalion pathum, CRPF battalion pakhat leh NDRF company pakhata sipai damlote enkawl ṭhin an ni a; sawn a nih chuan sipai damlo enkawlna kawng­ah mipui­teah harsatna a thlen phah thei dawn a ni," a ti a; damdawi-in chu sawn chhuak lo a, tihchangtlun a ṭul thu a ziak.

Prof. JV Hluna hian October 30, 2016 aṭanga Aizawl leh Imphal inkara Air India flight tihtawp chungchang pawh Civil Aviation minister P Ashok Ganjapathi Raju hnenah thlenin, Aizawl leh Imphal inkarah Air India thlawhna thlawhtir leh a nih theih nan hma la turin turin a ngen a ni.