SEAM-in SSA-a thawkte mangang lo turin chah
SSA Employees’ Association of Mizoram (SEAM) chuan thuchhuah siamin, Mizoram SSA-a thawkte'n August 2016 aṭanga hlawh an lak theih loh chungchangah mangang lo turin SSA-a thawkte an ngen a; an harsatna chu politics-a inchirhtheh nana hmang lo turin political party-te leh mipui an ngen bawk.
SEAM hruaitute chuan nimin khan parliamentary secretary (School Education) Joseph Lalhimpuia a pisaah an kawm a, SSA-a thawkte'n thla nga chhung hlawh an lak theih tawh loh chungchang an sawipui a ni.
SEAM thuchhuah chuan, sorkar laipuiin kum 2016-17 chhunga Mizoram SSA hnena cheng nuai 19625.21 a pek turah tun thlenga nuai 4318.83 chiah a la pek avanga SSA-a thawkte'n thla nga chhung hlawh an la thei lo tawh chu pawi an tih thu an sawi a, "Hlawh kan lak thuai theih nana Mizoram sorkarin theihtawpa hma a la hi lawmawm kan ti a, sorkar hmalakna vangin SSA-a thawkte’n hlawh kan lak thuai theih kan beisei," an ti.