Nausen thi pun chhanah sorkar puh

MNF party chuan thuchhuah siamin, Mizorama nausen thi pun chhan chu Congress sorkar inthlahdah vang niin an tarlang a, vanduaithlak an tih thu an sawi.

Nimina MNF thuchhuah chuan, Sample Registration System Bulletin, tun hnaia Census of India-in a tlangzarh takah Mizorama nausen kum khat hnuai lam thi zat tehna, infant mortality rate (IMR)-ah Mizorama nausen thi zat punna chu 80% a tling niin an tarlang a, "Congress sorkar inthlahdah lutuk vangah kan ngai," an ti.

MNF party chuan, mihringte hriselna tura thawktu ber Health department chu ngai pawimawh em em turin Congress sorkar leh a enkawtu Minister an ngen a ni.