NILP-a ṭan rualpuiah Minister-in thawktu, kohhran leh páwl a sáwm

School Education minister Lalchhandama Ralte hoin nimin khan School Education conference hall-ah State Literacy Mission Authority Governing Council leh Executive Committee an ṭhukhawm a, hmalak dan tur an sawiho. Minister chuan, New India Literacy Programme (NILP) hnuaiah ziak leh chhiar zirtir kawnga ṭanrualpuiah thawktu te, kohhran leh tlawmngai páwlte a sáwm.

Lalchhandama Ralte chuan, NILP hnuaiah ziak leh chhiar zirtir kawngah ṭan rual a ṭul thu sawiin, "NILP-ah hian thawktute mai bakah, kohhrante leh tlawmngai pawlte ṭan rualpuiah ka sawm che u a ni. Ziak leh chhiarah Mizoram hi a sang ber pawl kan nih avangin Mizoram zahawmna vawng nung a, tithang mawi zel turin i ṭangrual ang u," a ti.

Mizoram chu digital literacy lamah pawh a hniam lo tih sawiin Minister chuan, "State dangte nena khaikhin pawhin a ṭha pawl tak kan ni a, chhiarpui neih hunah pawh NILP tehfungah ziak leh chhiar thiam hian digital literacy a huam tel avangin heti lama kan hmasawnna hi hmuh hmaih loh ni se," a ti a; ziak leh chhiar zirtirnaah sikula thawktute an rim deuh dawn rualin, kohhran leh tlawmngai pawlte pawh kutke pawimawh an nih avangin theihtawp chhuah turin a sáwm a ni.

Samagra Shiksha state project director Lalhmachhuana chuan, NILP-in kum 15-35 inkar a tinzâwn dawn tih sawiin, "A hnuai lam chu RTE-in a huam sa. Kum 2030-ah India ram mipui chu ziak leh chhiar thiamtir vek tum a ni a, he prog­ramme hian ziak leh chhiar thiam lo mi nuai 500-te a tinzâwn dawn," a ti a; kum tin mi nuai 100 zel ziak leh chhiar thiamtir tum a nih thu a sawi.

State Literacy Mission Authority ṭhutkhawmah hian School Educa­tion secretary Dr Lalzirmawia Chhangte, Social Welfare secretary Sangchin Chinzah, School Educa­tion department leh Samagra Shiksha officer-te bakah, service association, kohhran leh tlawmngai pawl hruaitute an tel a ni.