Central leh state sorkar ṭanho a ṭul - Dr R Lalthangliana

Ministry of Health & Family Welfare leh Gujarat sorkarin Kevadia Tent City-a 14th Conference of Central Council of Health and Family Welfare (CCHFW), Swasthya Chintan Shivir tia sawi bawk an buatsaihah Health minister Dr R Lalthangliana a tel a, sorkar laipui leh state sorkarte an ṭanho a ṭul thu a sawi.

Minister Dr R Lalthangliana hi 'Central-State Cooperation & Coordination: Healthy States Healthy Nation' tih thupui sawihonaah co-chairman atan ruat a ni a; R Lalthangliana chuan, damlote inenkawlna senso a tlem zawk theih dan tur leh mi tin thleng phak universal health coverage a pawi­mawh thu sawiin, "Sorkar laipuiin health project leh programme a neihahte sum hman tur a hun taka a pek ṭhin loh avangin hna a kal muang a, thawktute'n harsatna an tâwk ṭhin. Sorkar laipui leh state sorkar hrang hrangte ṭanho a ṭul," a ti.

Dr R Lalthangliana chuan, sorkar laipuiin hmalak dan tur dap se a duh thu sawiin, "A bik takin thawktute hlawh a hun taka pek theih a ni lo ṭhin hi a pawi a, hlawh an lak tlai tawh loh nan kawng kan zawn tlàn a ngai a ni," a ti bawk.

CCHFW hi India Constitution Article 263 tlawhchhana din a ni a, India rama hriselna lama sorkar hmalakna chungchanga inràwn­khawmna sang ber a ni.

CCHFW hi May 5-7, 2022 chhung neih tur niin, May 5 khan hawn a ni a; a hawnnaah hian Union Health minister Dr Mansukh Mandaviya, HFW minister of state Dr Bharati Pravin Pawar leh Gujarat chief minister Bhupendrabhai Patel-te an tel a, state tina health minister, health secretary leh National Health Mission mission director-te bakah, MoHFW official-te an tel.

Intawhkhawmnaah hian hriselna lama policy khawih pawimawh tak tak sawiho a ni a, thupui atan 'Towards a future-ready healthcare ecosystem' tih an hmang. Mizoram aṭangin Health Minister bakah, Health secretary R Lalramnghaka leh NHM mission director Dr Eric Zomawia te an tel a ni.