MJA-in Book of the Year lawmpui

Mizoram Journalists' Association (MJA) General Headquarters, Aizawl chuan nimin khan Aizawl Press Club-ah MJA member zinga MAL Book of the Year 2021 dawngtu Lalhruai­tluanga Chawngte, news editor, The Aizawl Post lawmpuina hun an hmang.

Book of the Year 2021 'Hnam ropuite u, tho r'u le' tih ziaktu Lalhruaitluanga Chawngte lawmpuina inkhawm hi MJA vice president Lalremsiama'n a kaihruai a, MJA President leh lehkhabu ziaktute'n thu an sawi.

MJA President chuan, mi tam takin diary pawh an ziak ṭha peih lo a, lehkhabu ziah phei chu a harsa lehzual tih sawiin, "MJA-a kan member Hruaitea lehkhabu kum 2021 chhunga lehkhabu chhuak 170 chuang zingah a ṭha bera an thlang hi kan lawmpui tak zet a, kan chhuang hle. Mizo literature khawvelah a thawh hlâwk berte zingah a tel niin ka hria a, Mizo hnam leh literature tan fa hrin man awm tak a ni," a ti a, tuna a thlen chinah duh tâwk mai lo a, sang zawk thleng tur leh ziak zel turin a chah.

Lalhruaitluanga Chawngte pawhin thu sawiin, Pathian mal­sawmna a dawn nasat thu a sawi a, "Book of the Year hi ka beisei miah loh a ni a, kan rilruah a lang pha lo a, ka insit hial zawk a ni. Chanchinbua ni tina thu kan ziah hian min pui nasa a, chanchinbua thiam lo chung chunga ka awm ve hi ka hlâwkpui tak zet a ni," a ti.

MJA hian Lalhruai­tluanga Chawngte hnenah hian Book of the Year a dawn lawmpui nan thuchei leh Rs 10,000 an hlân a ni.