ASF vanga vawk thite NSS-te'n an phûm

Kumin March thla tàwp lam aṭanga nimin thlengin Farkawn khuaah vawk pûl hri, African Swine Fever (ASF) vangin vawk 582 a thi tawh a; vawk thi a tam avangin Farkawn Higher Secondary School-a National Service Scheme (NSS) volunteer-te chuan nimin khan ASF avanga vawk thite paih leh phúmin an hnatlang.

Farkawn khaw chhung hmun hrang hranga vawk thite chu Farkawn NSS volunteer-te chuan la khawmin, lirthei hmangin an paih a, VC-in vawk phûmna hmun an siam, Farkawn aṭanga km. 2 vela hláah an phum a, vawk 92 an phúm a ni. Vawk paihna leh phûmna senso atan Farkawn khaw chhunga chhungkaw tinin Rs 200 ṭheuh an thawh khawm a ni.

Farkawnah hian kumin March thla tàwp aṭangin vawk a thi ṭan a, nimin thleng khan vawk 582 thi tawhin, vawk puitling deuh vek a ni a, a notê eng emaw zat a thi bawk. Farkawnah hian vawk sa kg. khat Rs 350 man a ni a, vawk thi tawhte chu tualchhunga hralhna anga chhûtin cheng nuai 176 chuang hû a tling. Vawk dam lai 2,500 chuang a la awm bawk.

AH&Vety director Dr Lalremliana leh vety doctor eng emaw zat chuan Farkawna ASF avanga vawk thite zir chiang turin nimin khan Farkawn an thleng a, VC, tlawmngai pawlte leh vawk vulh pawlte nen inkâwmin, hmalak dan tur an sawiho a ni.