Tlàwmna nen mipui rawngbawl tur kan ni - Lalsawta

Mizoram Pradesh Congress Committee president Lalsawta chuan, Congress party chu tlàwmna nen mipui rawngbawl tur an nih thu sawiin, dawhtheihna nena nunga mi ṭanpuitu tur an nih thu a sawi.

Lalsawta hian nimin khan Congress Bhavan-a inkhawmah thu a sawi a, tlàwmna nen politics khelh a ngai tih sawiin, "Congress party hi chapo taka kal tur kan ni lo a, tlàwmna nen mipui rawngbawltu kan nihna angin kan kal tur a ni," a ti.

Congress party hruaitute leh member-te chu khawi hmunah pawh dawhtheihna leh tlàwmna nena nung tur an ni tih sawiin Lalsawta chuan, "Mi dang tana harsatna siamtu ni loin, ṭanpuitu kan ni zawk tur a ni," a ti a; Congress chu thil tak tak duh mi, hmasawnna tak tak thlentu niin miin an hria a, 'Congress nge nge' an ti ṭhin nia sawiin, chu chu vawng nung reng tur an nih thu a sawi.

MPCC thuchhuah chuan, MPCC President hian nimina inkhawmah hian voter pasarih a lawm lut niin an tarlang.