KHAWTHLIR

Thisen pe
Salvation Army Youth (SAY) Central South Division chuan nimin Aizawl Temple Corps hall-ah thisen pek an huaihawt a, Civil Hospital, Aizawl tan thisen unit 27 an pe a, petute mipa 22 leh hmeichhia panga an ni.

Elocution competition
Azadi Ka Amrit Mahotsav pualin nimin khan Lunglei Art & Culture Auditorium-ah sikul leh college zirlaite tan thusawia intihsiakna, Elocution Competition buatsaih a ni a, district bawrhsap Kulothungan A-in a hmanpui. Intihsiakah hian zirna-in panga telin, thupui thlan sa pahnih - 'Clean India, Green India' leh 'My duties as a citizen' tihte hmangin an intihsiak a; Baptist Higher Secondary School-a pawl 12 zirlai Lalhriatpuii Pachuau pakhatna a ni.

Hriselna Kûtpui
India ram zalenna kum 75-na tlin lawmna, Azadi Ka Amrit Mahotsav pualin nimin khan Ngopa RD Block-a khuate tan Ngopa damdawi-in (CHC)-ah National Health Mission bultumin Hriselna Hûtpui (Health Mela) buatsaih a ni. Mela-ah hian clinic/stall 15 hawn a ni a, Champhai District Hospital leh Ngopa CHC-a thawktute'n mi 1,200 vel hriselna an endik a ni.

IAS-a kaite chhuang
PC party-a Women Wing chuan thuchhuah siamin, sorkar laipuiin MCS officer pahnih - Sangchhin Chinzah leh Zodingpuii te IAS-ah a kaitir chu an lawmpui thu leh an chhuan thu an tarlang a, "Mizo hmeichhia min chawi sáng a, kan hnam min tizahawmtute hi kan ram tana an thawh zelna turah duhsakna sang ber kan hlan a ni," an ti. Mizoram University Convocation neih taka zirlai hlawhtling zingah hmeichhia an tam zawk chu lawmawm an tih thu an sawi bawk.

Covid-19 vaccine
Mizoramah May 5, Ningani thleng khan mi 8,49,278-in Covid-19 vaccine an la tawh a, chu'ng mite hnenah chuan vaccine dose 15,77,701 pek a ni tawh. Vaccine dose khatna la tawh mi 8,49,278 zinga 6,87,175-in dose hnihna an la tawh a, precautionary dose la tawh mi 41,248 an awm.