Sarâng thlâkna siam dan tur sawiho
Hman khat daih sarâng (single use plastic) khap a nih avanga sarâng thlâkna tur siam chhuah dan tur ngaihtuahin nimin khan EFCC department conference hall-ah thuneitute an ṭhukhawm a; entrepreneur-te leh self help group-te ṭanpui theihna tur project lian tham deuh siam dan kawng zawn an rél.
Ṭhutkhawm hi Mizoram Pollution Control Board member secretary C Lalduhawma'n a kaihruai a; Commerce & Industries leh Horticulture department aiawh, Bamboo Development Agency, NEDFI leh NABARD aiawhte an tel.
C Lalduhawma chuan, hman khat daih sarâng chu sorkar laipui thuchhuak zûlzuiin Mizoramah pawh khap a nih thu a sawi a, "Chief Secretary hoin action plan siam a ni a, chumi zinga pakhat, sarâng thlâkna tur siamtute’n sum leh paia puihna an dawn theihna tur kawng zawnpui dan ngaihtuah turin ṭhutkhawm a ni," a ti.
Kal khawmte chuan, hman khat daih sarâng thlâkna tur siam lama tui mite chu an thawhpui reng theih thu te, sum hmanga an puih nual tawh thu leh an puih zel theih thu an sawi a ni.
Hman khat daih sarâng thlakna tur siamtute'n an siam theih zat leh an dinhmun dik tak hriat a pawimawh thu te, entrepreneur-te leh self help group-te ṭanpui theihna tur project lian tham deuh tak siam a ṭul thu an sawi a; mau aṭanga siam ha kherna (toothpick), beng hawlhna (earbud) kuang, bawlhhlawh báwm leh a dangte siam dan kawng zawn ni se an ti.
Entreprenuer ṭhenkhatte harsatna tawh, kudam ṭha an neih loh chungchang sawi lan a ni a, Horticulture department-te nen ṭanghoa tih dan kawng zawn ni se, an kudam neih sate hman theih dan kawng zawn ni se an ti bawk.