Serchhip Bazarah plastic hman tlem dan tur sawiho

Serchhip bawrhsap Nazuk Kumar chuan nimin khan Serchhip bazara sumdawngte chu plastic aṭanga siam chawhmeh fûnna leh thil dang atana hman ṭhinte hman tlem dan tur a sawipui.

Sawihona hun hi additional DC Lalmuansanga Ralte-in a kaihruai a; Nazuk Kumar chuan, Mizoram sorkarin polythene pan tak hman a khap tawh tih sawiin, "Ei tur, nepnawi leh bazar chawhmeh fûnna atana kan hman ṭhinte hi khap tura tih a ni a, plastic aṭanga siam thilte hi ṭawih thei lo a nih avangin bawlhhlawh sawngbawlna hmunahte pawh a tam ber a ni zel a, buaipui a ngai tak zet," a ti.

Polythene hmang tlém tura hmalaknaah bazara chawhmeh zuartute an pawimawh tih sawiin Bawrhsap chuan, "A bul ṭantu leh mite zirtirtu in nih a ṭul a, a theih chin chinah a hman tlem dan tur lo ngaihtuah ṭan turin ka sáwm che u a ni. Tun thla aṭang hian hman tlem dan tur zirin ṭan kan la ang a, thla thar aṭang chuan paper bag chauh hmang tura hmalak a ni ang," a ti a; dan hmanga khapbeh ai chuan mi tinin polythene hman tlem duhna thinlung an neih chu ramin a hlâwkpui zawk dawn tih a sawi.

Sawihonaah hian polythene hman tihtlem a nih theih nana hmalak dan turte sawiho a ni a; bazara sumdawngte chuan, tun hma pawhin polythene bag hmang tawh lo turin hma an lo lak tawh ṭhin thu leh mipui lam aṭanga harsatna an tawh ṭhin avangin an tih zui zel theih loh thute an sawi a ni.