Manifesto tihlawhtling chak ber kan ni - Robert Romawia

7th May, 2022

Minister of state Robert Romawia Royte chuan, Mizorama sorkar awm tawh zawng zawngah MNF sorkar chu manifesto tihlawhtling chak ber sorkar a nia sawiin, "Sorkar awm tawh zawng zawngah Covid hripui léng mah se manifesto tihlawhtling chak ber sorkar kan ni," a ti.

Nimina Mizo Hnam Runa inkhawmah thu sawiin Robert Romawia chuan, "Pathianin MNF sorkar a hruai a, kan CM nachang hriatna leh hruaina zarah tun thlengin kohhran leh tlawmngai pawlte nen thawhhona ṭha tak kan nei mek a ni," a ti a; CM Zoramthanga chungah tlawmngai pawl, kohhran leh mipuiin rinna an nghat mek niin a sawi.

Robert Romawia Royte chuan, ramria inkah a ngaih hunah sorkar force-in hma an hruai tawh tih sawiin, "Sorkar hmasaa ramria zirlaite leh journalist hmeichhiate'n vuak an tuar lai khan khawiah nge sorkar a awm? Pu Zoramthanga sorkar a pian hnuah chuan ramria buaina apiangah sorkar mi tirh, kan police-te an tlan thleng hmasa ber zel a, chutah chuan awmhmun an khuar nghet nghal zel a ni," a ti.

MNF Adviser chuan, Covid hripui kara Mizoram sorkarin sorkar sum a enkawl dan chu duhawm a tih thu sawiin, "Sorkar officer lian ṭhenkhat leh thil inti hre ve tak takte'n ‘Zu zawrh in titawp a, sorkar tax hmuh a tlem dawn si a, in harsa ang a,' te min ti a, an hriat loh vang a ni," a ti a; zu zawrh lai aiin khap hnuah Mizoram sorkar sum deh chhuah (tax revenue) a tam daih zawk thu a sawi.

Robert Romawia sawi danin, dan hnuaia zu zawr a nih laia sorkarin sum a dehchhuah zat chu - kum 2015-16 ah cheng vbc. 249, kum 2016-17 ah vbc. 313 leh kum 2017-18 ah vbc. 424.92 a ni a; zu khap hnuah chuan - kum 2019-20 ah vbc. 667, kum 2020-21 ah vbc. 677 leh kum 2021-22 ah vbc. 894.75 a ni.

Congress sorkar laia sorkar leibá a tlem ber lai (kum 2018)-ah leiba chu GSDP aṭangin 38.9% a nih thu sawiin Robert Romawia chuan, "MNF sorkar hnu (2021) chuan kan leiba chu GSDP aṭangin 31.2% a ni. Leiba-GSDP rate hniam chhan chu kawng tinrenga kan thawh chhuah tam vang leh sum dehchhuah (tax revenue) lama hmasawnna tam vangte a ni," a ti.