Thangmawia'n DIET annual sports a hmanpui

District Institute of Education and Training (DIET), Aizawl Trainees Union chuan nimin khan Lammualah Annual Sport khârna hun an hmang a, Human Resources Development Board vice chairman L Thangmawia, MLA-in a hmanpui.

L Thangmawia chuan, khawvel ram hrang hrang leh India ramah zirtirtu tur an duhtui sâwt hle tih sawiin, "Tunah chuan trained lo tan zirtirtu a nih theih tawh loh a, college leh university-ah pawh doctorate degree nei lo tan a luh theih loh thuai dawn," a ti a; DIET-a zirlaite chu Mizoram sorkar hnuaia zirtirtu an nih hunah sorkarin a dahna a pianga awm turin a chah.

Mizoram khaw 400 velah kum 2019 aṭangin zirtirtu quarters sak a nih theih nan hma an la tih sawiin Thangmawia chuan, "Zirtirtute pawimawhzia hriain Education Minister kaihhruai Human Resource Development Board-in hma a la a, theihtawp chhuaha kan CM leh Planning Board-te'n min buaipui chhunzawmsak chungin Covid-19 avangin sorkar laipui lama kan dilnate a la hlawhtling thei rih lo," a ti a; DIET-a an training course-ah duh tawk mai loa inzir belh zel turin a chah bawk.

DIET, Aizawlah hian D.El.Ed leh B.Ed zir theih a ni a, zirlai 450 leh zirtirtu 32 an awm mek a ni.