Lungleiah ruahtui khâwl dan tur sawiho
Lunglei district bawrhsap Kulothungan A hoin nimin khan DC conference hall-ah sorkar hotute'n Lunglei district-a Jal Shakti Abhiyan: Catch The Rain 2002 (ruahtui khâwl) hmalak dan tur an sawiho. Jal Shakti Abhiyan hmalakna leh hmachhawp nei line department-te chu an hmalaknate DC-ah thlalak nen kimchang taka thehlut tura tih an ni.
Kulothungan A chuan, sorkar laipui leh Mizoram sorkar hmalaknain tui harsatna pumpelh a nih theih nan Jal Shakti Abhiyan: Catch The Rain 2022 chungchanga hmalak dan tur sawiho a ṭul thu a sawi.
Ṭhutkhawmah hian Lunglei district-ah tui hnianghnar neih a nih theih nan ruahtui leh tui khawlkhawm nan sorkar leh mimal inah rooftop rain water harvesting system (RWHS) siam a, tui khawlna tur khur siam te, RWHS neih sa enkawl ṭhat te, check dam leh tuikhuah siam te, lui tui luanna dâltu tihfai te, watershed tihchangtlun te, water catchment huamchhung humhalh bakah tui hna zawn chhuaha geo tagging tih te, scientific taka tui khawl dan kawng siam te, ramngaw humhalh leh mipui hnena zirtirna pek dan turte an sawiho a ni.