Mizoram Police-in lirthei siamna man Leiba Rs. 28,625,988 an nei mek

Mizorama police unit hrang hrangte chuan January 6, 2017 thleng khan workshop-a lirthei chhe siamna man bâ Rs. 28,625,988 an nei. Lirthei siamna man bâ hi tun dinhmunah sorkarin rulh tumna a neih hriat a ni lo.

Mizoram pumah police station 38 leh outpost 13 a awm mek a; PS leh outpost-te'n lirthei chi hrang hrang an kawl zawng zawng zawng chu 75 a ni a, chu'ng zinga pakhat chu hman theih tawh loh niin, pakhat dang chu siam ṭhat tum mek a ni.

Vanglaini-in RTI Act hmanga a zawhna Police headquarters-a SPIO-in a chhan danin, Police unit hrang hrang 24-in lirthei siamna man an bat mek chu Rs. 28,625,988 a ni; tun dinhmunah 5th. IR battalion-in nei tam berin, cheng nuai 35 chuang an ba mek.

Police unit hrang hrangte'n workshop bill bá an neihte hi sorkarin rulh a tum leh tum loh zawh a ni a, Police SPIO chuan, "Sorkarin rulh tumna a neih leh neih loh hriat a ni lo," a ti.

Workshop man bâ hi sorkar sum dinhmun azirin rulh ṭhin a nih thu te, a rulh dân phung leh rulh hun tur hriat theih a nih loh thu a tarlan rualin, rulh zawh loh a awm pawhin kum hnih/thum bak bat a nih ngai meuh loh thu a tarlang.

Police unit zingah motor workshop bill ba tlem ber Siaha DEF (District Executive Force)-in Rs. 1,01,010 an bá a, a ba tam ber 5th. IR battallion-in Rs. 3,593,365 an bá. Cheng nuai 20 chuang bá Police unit panga an awm a; chungte chu 5th. IR bakah, Aizawl DEF Rs. 25,91,175, SEC Rs. 22,89,197, 2nd. IR battalion Rs. 22,45,715, Police Training School, Thenzawl (PTS) Rs. 21,76,647-te an ni.

Cheng nuai 10-20 inkar ba mek unit paruk an awm a; chungte chu - 1st. IR Battalion Rs. 19,18,610, MPRO Rs. 16,31,695, Lunglei DEF Rs. 16,28,764, 1st. MAP Rs. 15,44,834, Police Headquarters (CPW) Rs. 13,80,035, leh Champhai DEF Rs. 11,28,191-te an ni. Police unit 13 chuan cheng nuai 10 an ba tling lo vek thung.

Police unit hrang hrangte'n lirthei 75 an kawl mek a; Lungsen PS-in Gypsy King an kawl chu a chhiat nasat tawh avangin hman tlak a ni tawh lo a, Borapansury PS-in Gypsy pakhat pawh thawm ṭhat mek a ni.

PS leh outpost-te'n lirthei kawl dan chu - Sumo 9, Gypsy 31, Gypsy King 3, motor cycle 20, Bolero 2, Splendor bike 2, Glamour bike 3, prison van 1, Yamaha bike 3, bike 2-te a ni.

Police station 38 zingah lirthei pakhat chiah kawl PS 26 an awm mek a, outpost 11-in lirthei pakhat chiah an kawl mek bawk.

PS 26 zinga lirthei pakhat kawlte chu - Sairang, Darlawn, Sakawrdai, Thingsai, Lungsen, Bunghmun, Tlabung, N. Vanlaiphai, Tuipang, Phúrà, Kolasib, Vairengte, Bairabi, Kawnpui, Lawngtlai, Chawngte, Borapansury, Vasei, Sangau, Champhai, Khawzawl, Ngopa, Mamit, West Phaileng, Kawrthah leh Kanhmunte a ni.

Police outpost bikah New Vervek, Hrang­chalkawn, South Vanlaiphai, Kawlchaw, Siaha Tlangkawn, Lungbun, Bungtlang, Bualpui NG, Saiphai, Zokhawthar leh Zawlnuam ten lirthei pakhat ṭheuh an kawl. Lirthei pakhat aia tam kawlte chu - Aizawl PS, Bawngkawn, Vaivakawn, Kulikawn, Sialsuk, Saitual, Lunglei, Serchhip, Thenzawl, Siaha leh Marpara PS-te a ni.

Police lirthei siam man bá

Unit Bat zat

5th. IR battallion Rs. 3,593,365

Aizawl DEF Rs. 25,91,175

SEC Rs. 22,89,197

2nd. IR battalion Rs. 22,45,715

PTS Thenzawl Rs. 21,76,647

1st. IR Battalion Rs. 19,18,610

MPRO Rs. 16,31,695

Lunglei DEF Rs. 16,28,764

1st. MAP Rs. 15,44,834

Police Headquarters Rs. 13,80,035

Champhai DEF Rs. 11,28,191

Mamit DEF Rs. 9,85,460

CID (Crime) Rs. 8,60,150

Serchhip DEF Rs. 8,09,000

3rd. IR Battalion Rs. 8,01,672

4rd. IR Battalion Rs. 5,53,710

Lawngtlai DEF Rs. 5,50,825

2nd. Bn. MAP Rs. 4,20,840

Kolasib DEF Rs. 3,92,525

DIG (SR) Rs. 3,57,280

TRF Rs. 2,58,168

3nd. Bn. MAP Rs. 2,66,370

CID (SB) Rs. 1,40,750

Siaha DEF Rs. 1,01,010