MG Road kawngpui a khîk belh zel avangin Bible House bungruate thiar chhuak turin ti

Upper Khatla, MG Road-a Baptist House leh Bible House kawt kawngpui khi chu tun hnaiah a khîk belh leh avangin January 14, 2017 khan UDPA minister Zodintluanga leh sorkar mi pawimawhte'n a hmunah an enfiah leh a; Bible House building-a bungraw rit zualpui chu thiar chhuah turin an ti.

Minister Zodintluanga chuan, MG Road-a kawngpui khî leh Bible House khìte chu a zauh hret hret avangin ngaih­thah theih a ni lo tih a sawi a, "A che reng tih a hriat a, a hlauhawm a ni. A hlauhawm lo tih hi kan ngaihdan tur a ni lo," a ti.

Bible House kawt lei khì hi December 6, 2016-ah hmuh ṭan a ni a, December 7 zinga UDPA Minister leh sorkar official-te'n an enfiah hnuah, a thlanga State Convention Centre sakna tura tura lei laih chu chawlhsan nghal tura tih a ni.

Inrinni zan leh nimin lamah pawh a chêt belh leha hriat a ni a, nimin khan lei hnuai aṭangin tui a pût chhuak ṭan a, PHE pipe (connection pipe) a inpawt dawk nual tawh niin PHE hotute chuan an ring. PHE hotute chuan, leia phûm connection pipe hmangin tui an pe ngam tawh rih lo tih sawiin, tui an pek dawn pawhin kawngpui chungah pipe thar kaltira pek a ngaih dawn thu Vanglaini an hrilh.

Sorkar hotute chuan, lei a khîk belh zel avangin Bible House-a bungraw rit zualte chu sawn chhuak tur leh motor dah ṭhinte chu dah tawh rih lo turin an ti a; a thlanga State Convention Centre sakna tura lei laih tawhah a rang thei ang bera retaining wall siam tura tih a ni bawk.

Bible House-ah hian chhungkaw pathum awmin, mi 19 an chêng mek a, an vaiin Bible Society of India-a thawkte an ni.

BSI Aizawl Auxiliary secretary C Thangnghilhlova chuan, Bible House chu sor­karin ṭhiah ṭha a tih chuan Bangalore lama BSI hmunpui an hriattir phawt a ngaih tur thu a sawi a, "BSI Trust Committee nen tih dan tur ngaihtuah a ngai dawn a, sorkar nen pawh uluk taka ngaihtuahho a ngai ang," a ti.

Traffic SP chuan MG Road-ah hian 407 truck leh a aia liante chu tlan phal a nih loh thu leh Aizawl chhim lam pan tur truck-te chu Treasury Square - Sikulpuikawn via Upper Republic kawng lamah kal vek turin hriattirna a chhuah a; January 14-a hman ṭan nghal a ni.

Hetih lai hian, January 14 zanah pawh MG Road-ah hian truck lian tlân hmuh tur a la awm thung.