January chhunga SSA hnathawktute hlawh pe turin eptu MLA-in sorkar phût

MLA Lalruatkima, MNF general secretary chuan Mizoram sorkar chu SSA-a thawkte sum awm ang ang hmanga hlawh pe duh loah a puh a; an sum neih sate hmanga January thla chhung ngeia hlawh pe turin an phût tih a sawi.

Lalruatkima hian Inrinni khan Aizawl Press CLub-ah thuthar theh­darhtute kâwmin, sorkarin SSA-a thawkte hlawh a pek loh chungchang a sawi a; mi pakhatin Facebook group pakhata SSA lehkha pawimawh thlalak a post chu a dik vek tih a sawi a ni.

MLA Lalruatkima sawi danin, sorkar laipuiin Mizoram SSA sum hman tur cheng nuai 1441.31 chu September 29, 2016-ah a rawn pe a, chumi hmang chuan SSA State Project Director-in October 6, 2016-ah proposed expenditure siamin, middle school (UPS) leh primary school (PS)-a zirtirtute thla hnih hlawh tur leh thawktu dangte thla khat hlawh tur cheng nuai 342.4 leh office inenkawlna atan cheng nuai 57.41, a vaiin cheng nuai 144.31 dilna, Finance department-ah a thlen a ni.

UPS leh PS zirtirtu tan thla hnih hlawh a dil laia SSA thawktu dangte hlawh tur thla khat a dil chhan chu, cheng nuai 1441.31 bakah SSA Account-a sum awm sa, nuai 563.92 aṭanga pek tum a nih thu, sum dilna note-ah ziah a ni tih sawiin, Lalruatkima chuan, "Sorkar laipuiin sum a rawn pek ang leh SPD-in sum hmanna tur a ruahman angin November 2, 2016-ah Finance-in cheng nuai 1441.31 hman a phalsak (expenditure sanction) ta a, November 2016 tawp lam khan thla khat (July) hlawh chauh SSA-a thawktute'n an la a ni," a ti.

Lalruatkima chuan, SSA-in Finance-a sum dilnaah thla hnih hlawh tur a dil lai leh an dil anga sum an hmuh laia thla khat hlawh chiah thawktute pek an ni chu sawiselin, cheng nuai 1441.31 aṭanga thla khat hlawh pek hnua a la bâng nuai 594.11 leh a hmaa SSA account-a awmsa nuai 563.92 (belhkhawmin nuai 1158.03) chuan SSA-a thawkte zawng zawng thla khat hlawh a la daih avangin, Mizoram sorkar chu thla khat hlawh tal pe leh turin a phût a ni.

SSA-a thawkte hlawh tur sum chhehrelhsak tawh lo turin Mizoram sorkar an phût tih sawiin, Lalruatkima chuan, "Thla khat hlawh pek tur an la neih hi January thla chhung ngeia pe turin kan phût a, SSA-a thawkte'n hlawh an lak theih nan kan nawr zel dawn a ni," a ti.

Lalruatkima chuan, SSA-a thawkten thla nga chhung hlawh an la thei tawh lo chunga SSA hnathawktu pawlin sorkar chunga lawmthu sawina thuchhuah an siamte chu thuneitu sang lamin an nawr luih vang nia sawiin, Congress kaihhruai sorkar chu a hnuaia thawkte vau beh ching tawh lo tura an phût tih a sawi.