KHAWTHLIR

Induction service
Nimin khan Mizoram Presbyterian Kohhrana pastor leh probationary pastor, an awmna hmun sawnte leh lût thar ṭhahnem tak pualin an awmna tur bialah lak luhna inkhawm, induction service neipui an ni a; Synod puipate leh pastor hrang hrangte'n induction service an kaihruai. Induction service neihpuite hi pastor/minister 71 leh pro. pastor 23, an vaiin mi 94 an ni a, Mizoram chhung leh páwna awm turte an ni.

In kâng
January 13, 2017 zan dar 8:30 vel khan Champhai district-a Thekte khuaah Vanawia in, Assam type, a fapa Lalremthanga luah lai chu a kâng a, bungrua chuh hman lohin a kâng ral. Kângmei tuartute hi Inrinni khan BDO aiawhte'n an tlawh a, bialtu MLA T Sangkunga'n in chung tur rângva bundle li a ngaihtuahsak tur thu a sawi.

NCCI Pathianni
Baptist Church of Mizoram chuan, nimin khan NCCI Pathianni an hmang a, tualchhung kohhran tinah chawhma inkhawmah hun hmangin, thupui chu 'Inpumkhatna' tih a ni. BCM hian kum 2007-ah NCCI an zawm a, chumi hnuah NCCI Committee member an nih ve ṭhin avangin kum 2016-a BCM Assembly chuan NCCI Pathianni hman an rêl a, an hmanna hmasa ber a ni.

Mi 12 khawm
Central YMA Kumpuan Committee leh SRS ṭangkawp chuan, Inrinni zing khan Clean Bawngkawn Operation an nei a, ruihhloa inhnamhnawih mi 12 an khawm a, hnam dang dan loa sumdawng mi pahnih an man bawk.

Thisen pe
Inrinni khan Armed Veng South YMA-in an din champha vawi 31-na pualin Aizawl Civil Hospital tan unit 47 an pe a, a petute mipa 41 leh hmeichhia paruk an ni. Ramthar Veng Bial KṬP-ten Synod Hospital tan thisen unit 46 an pe a, a petute mipa 41 leh hmeichhia panga an ni. Kolasib-a Tata Projects-a thawktute pawhin Kolasib District Hospital-ah unit 14 an pe bawk.