BRO hotupain Larsap leh CM a kâwm

Border Roads Or­ga­­nisation (BRO) direc­tor general Lt.Gen. Suresh Sharma chuan January 13, 2017 tlai khan Governor Lt. Gen. Nirbhay Sharma leh chief minister Lal Thanhawla te an chennaah a kâwm a; Mizorama BRTF-te'n kawng an enkawl mek chungchang a sawipui.

Lt.Gen. Suresh Shar­ma chuan Larsap nen an inkawmnaah, Mizoram chhunga kawngpui an siam leh enkawl chungchanga harsatna an tawh hrang hrangte a sawi a; tun dinhmunah Project Pushpak hnuaiah Mizorama kawng an enkawl a tlem tawh a­vangin Task Force pakhat chauh an dah tawh thu leh, sum lamah harsatna eng emaw chen an neih avangin changtlung zawka Mizorama hna an thawh theihna atana ṭan lakpui turin Larsap a sáwm.

Governor chuan, ram chhung hmun hrang hranga BRTF-te hnathawh fakin, "Mizoram chhungah pawh an thawhrimna zarah kawngpui ṭha hmun kilkhawr ber thlengin a awm phah a. Tun hnaiah Mizoram chhim lamah ka zin a, Parva khua thleng ka kal a, BRTF kawng enkawl lai pawh a chhe hle tawh a ni," a ti.

Chief Minister chuan, BRO-te'n Mizoram tan hun hmasa lamah nasa taka an thawh thu sawiin, "BRO leh Mizo­ram mipuite inkarah in­laichìnna ṭha tak leh thawhhona ṭha tak a awm a, rambuai lai pawhin inhriatthiam lohna engmah awm lo mah se, tunah chuan BRO-ten China rál lian tur venna kawngah Arunachal Pradesh an ngai pawi­mawh niin a lang," a ti a; Mizoram pawh ramri depa awm a nih angin ngaih pawimawh a ṭul thu a sawi.

Lt.Gen. Suresh Sharma chuan, Mizoram chu BRO-ten ngai pawi­mawh mah se, Ministry of Surface Transport-in fûr lai kawng enkawlna tur leh thuam ṭhatna atan chauh sum an pek avangin kawng thar siam­na atan ministry-in sum an ruahman tlem tih a sawi a, "Chuti chungin Mizo­ram chhim lamah kawng thar siam tur pathum - N.Vanlaiphai-Thingsai-Bualpui-Saisih-Pangkhua; Zawngling-Mawhre-Chapui leh Dungtlang-Vaphai-Far­kawn te ruahman a ni," a ti.