Pipe a chhiat vangin PHE-in tui ren turin ngen

Aizawl tlâk lam veng zawng zawng leh chhuah lama veng ṭhenkhatte tui pekna pipe chu Inrinni zing khan Raj Bhavan bul kawngpuiah a keh a, Inrinni leh nimin khan a siamṭhat hna thawh nghal a ni. Hei vang hian pipe-in a châwm vengte chu tui ren tura ngen an ni.

PHE hotute hnen aṭanga thu dawn danin, tui pipe keh hi kum 1986-a phûm tawh a ni a, Tuikhuahtlanga tuizém lian aṭanga Aizawl tlak lam veng (Tuikual aṭanga hmar lam) zawng zawng châwmtu leh chhuah lamah Armed Veng, Bethlehem Veng, etc. châwmtu a ni.

Pipe chhia hi thlak a ni a, Inrinni leh nimin khan nilêng leh zankhuain hna thawh a ni a, PHE hotute chuan nizanah khan siam zawh hman an inbeisei.

PHE minister Zodintluanga chuan pipe chhe siam hi Inrinni tlai khan a tlawh a; pipe chhia chu nizanah an siam zo a nih pawhin, a châwm vengteah ni hnih chhung tui pek theih a nih loh avangin veng ṭhenkhatah chuan tui sem hunbi pangngaiah sem a ni lo thei tih sawiin, pipe chhiain a châwm vengte chu tui ren rih turin a ngen.