South Korea mite nen inkâwm

Agape Social Centre, Positive Women Network of Mizoram (PWNM) leh Light of Hope Ministry ṭangkawp chuan Inrinni khan Tourist Lodge, Chaltlangah 'Heart to Heart Meeting with Namkwang Presbyterian Church Youth (S.Korea)' an buatsaih a; Health minister Lal Thanzara'n a hmanpui.

Health Minister chuan, Mizoramin India rama HIV/AIDS vei tam ber dawttu nihna a hauh chu vanduaithlak a tih thu sawiin, "HIV do letna kawngah Mizoram mipui kan ṭanrual loh chuan AIDS natna hian min vaihma vek thei a, a do letna leh a invenna kawngah tumah kut kuangkuah thei kan awm lo,” a ti.

AIDS do letna leh a laka invenna kawngah sorkarin theihtawp a chhuah tih sawiin Lal Thanzara chuan, "Tun hnai maiah pawh US Ambassador to India-in MSACS office a tlawh ṭumin AIDS do letna kawnga thawhpuiah Mizoram sorkar chuan a sáwm a ni," a ti a; AIDS donaah sorkar leh Presbyterian leh Baptist kohhrante an thawhho mek thu a sawi.

Health Minister chuan AIDS veite fuihna thu sawiin, "AIDS natna vanga lungngaia in­dawmkun mai loin, engkim ti thei Pathian nung rinchhana huaisen taka nung turin ka duh che u. HIV/AIDS natna chu natna dang ang thoin natna pakhat mai a ni tih hriat a pawimawh," a ti.

Inhmuhkhawmah hian South Korea Namkwang Presbyterian Church aiawhte leh Heart to Heart member (HIV veite)-te pawhin thu an sawi a ni.