Hun tiama lo hâl lo leh ram tikângte Hrem turin hmalak a tul - CM Hawla

Chief minister Lal Thanhawla chuan, sorkar hun tiam chhunga lo hâl duh lo leh roadside reserve hâl ṭhinte hrem ngei an nih theihna atan hmalak a ṭul thu a sawi.

State Level Committee on Fire Prevention member-te nimina CMO conference hall-a an ṭhutkhawmnaah Chief Minister chuan, "Ram tikâng duh hrim hrim misual kan awm a, sorkar hun tiam chhunga hâl duh lote leh roadside reserve tikâng duhte hrem ngei an nih theih nan dan lekkawh turin hma kan lakho a ṭul. Kan pipute kha chu lo an hâl vanga kângmei chhuak thei lakah an fimkhur ṭhin hle," a ti.

Lal Thanhawla chuan, ram kâng venna kawngah sorkar leh tlawmngai pawlte'n thawhhona ṭha tak an neih thu sawiin, "Kan ram kan tihchhiat lutuk hmain eng emaw kan tih a ṭul a ni," a ti a; ramngaw leh thing leh mau te, chungléng savate leh luia nungchate ṭha taka humhalh nachang hriat tlan a pawimawh thu a sawi.

Meeting-ah hian lo hâl hun bituk zâwm lo an awm ṭhin chu sorkarin a ngaih thu tak thu tarlan niin, DC, DLAO leh V/C-te chu lo hâltute hming ṭha taka vawng tur leh, dan zâwm lote chhinchhiah tura hriattir ni se an ti a; ram dan zâwm loa May 15 hnu lama lo hâlte hrem dan report kimchang chu Sub-Committee on Fire Prevention hnenah thlen ngei an rel.

Mimal lo/huan hâl hun tur zawm lote chungah V/C-te'n hremna lekkawh ngei se, a khaw pumin an bawhchhiat chuan District Level Fire Prevention Committee-in hremna lekkawh se an ti. Sorkarin lo hâl hun chhung tura a ruahman chu ṭha taka zawm a nih theih nan LAD hnenah a hnuaia V/C-te chu uluk taka chîk tura hrilhhriat tum a ni.

Meeting-a tarlan danin, sorkar laipui chuan ram kâng ṭhin ngai pawimawhin tun hnai khan National Disaster Management Authority (NDMA) pawh hma la turin a hrilh a ni. NDMA hian kaihhruaina dante siamin, state tin chu Forest Fire Crisis Cell, Forest Fire Crisis Managment Plan-te siam turin thuràwn a pe a; chumi zûlzui chuan Environment, Forests & Climate Change department chuan ruahmanna an siam.

Kumin hian kum dang angin lo hâl hun atan March 15 aia tlai lo ruat a ni a, Lengpui Airport leh a chhehvel khuate leh Kawnpui lam thleng pawhin meikhûin thlawhna ṭum tur leh thawk chhuak tur a tihbuai loh nan chawhnu dar 3:30 hnuah chauh hâl tura tih an ni.

Kum 2016 chhung khan lo hâl hun bituk zâwm lo khua 98 an awm a, lo/huan hâl hmun 1,326-ah awmin, ram kâng hrim hrim hmun 298-ah a awm. Kum 2009 aṭanga 2016 thleng khan lo hâl vanga kâng leh kang hlum mi 14 an awm tawh.

Meeting chuan, kumina Fire Prevention Week chu kum dang aia hma, February 6-11 chhunga hman ni se an ti a; thupui atan 'Ram tikângtu chu ram hmelma a ni' tih an thlang.