Duhoma'n ZNP tichak turin mipui a sáwm

ZNP chuan nimin khan kum 2017 atan an party pisa an hawng. Hawnna inkhawmah an president Lalduhoma'n thu sawiin, Mizoram boruak hrang hrang karah ZNP chu hnam rilru pute belh tur awm­chhun nia sawiin, hnam rilru pu zawng zawngte chu ZNP tichak turin a sáwm.

Lalduhoma chuan, kum 2016 chu inchhàn ṭhat duh loh kum nia sawiin, Assembly House-ah inchhàn duh loh te, Mizo Carbon Products chungchangah sorkarin chhànna mumal a neih loh thu te, Dihmunzawla PHE building ṭhiah chungchanga sorkar insawi­fiahna chu tu tan mah awih chi a nih loh thute a sawi.

Rangkachak kg 54 vêl, cheng vbc. 14 vel hû tawlhruk suam chung­chang chu tun thlengin thu chiang hriat tur a la awm loh thu sawiin, Duhoma chuan, "Rev. Chanchinmawia thih thu ang maiin a thámral leh ang tih a hlauhawm hle," a ti a; lotterry chungchanga CAG report, sorkarin a sawifiah dan pawh a awihawm loh thu a sawi bawk.

Kum 2016 chu kum malsáwm lo a tih theih nia sawiin, Lalduh­oma chuan, vawk pulh nasat ber kum, sawhthing tihṭawih nasat kum, eirawngbawlna gas harsat kum, Mizoram puma kawng chhiat ber kum, lei (bridge) chim nasat ber kum, zu zawrh vanga pa valai leh police thih tam ber kum niin a sawi a, "Nikuma thil thleng aṭang hian kan sorkar hian 'Lalpa malsawm ram rim' a nam lo tual tualin a lang a... Corruption phoro a hnai lo hle," a ti.

ZNP President chuan, BJP sorkar hnuaiah Mizo hnam leh Kristian sakhua a him lo tual tuala a lan thu sawiin, "Chakmate hi Delhi-a BJP office-ah an tlatlum hle. Mizorama an lo zin pawhin Chakma hruaitute an rawn tel deuh zel," a ti a; MNF-in NEDA an zawm avang­in MNF sorkar ta se, Chakma minister an nei zui leh ngei dawn niin a sawi.

Lalduhoma sawi danin, Mizoram­a BJP tum pui ber chu kum 2018 inthlanah Chakma vote hmanga MLA panga tal neih a ni a; MLA ding lai eng emaw zat phawi chhuah an inbeisei bawk a ni.

ZNP an sorkar chuan kawngpui enkawltu tur Monitoring Committee an din dawn thu sawiin Duhoma chuan, "Kawngpui siam reng reng kum 10 chhungin a chhe ngai tawh lo ang tih mipui kan tiam a ni," a ti. Kum tluanin khaw tin tan buhfai leh gas hnianghnara pek an tiam thu te, solar energy nen ṭangkawpin Mizoram mamawh zat kawlphetha pek an intiam thu te, sawhthing leh thlai dangte leina atan D-A-H policy an la dinpui reng thute a sawi bawk.

ZNP President chuan, mipui­te chu kum 30 chhunga an kalna ṭhin kawnga kal hreh tawh si, kalna tur kawng dang hre si loin an ding ṭhuap mai nia sawiin, "ZNP policy lah chu chirhdiakah tángin, keimahni chakna chuan kan nem chhuak zo rih bawk si lo a. A ko­tlang aṭanga min thlir mai mai tawh loin min nam chhuahpui tur leh, ro hran hran rek loa ZNP hi min ṭawiawm turin ram veitu zawng zawngte ka sawm a che u," a ti.