KHAWTHLIR

ATM-ah Rs 10,000
Reserve Bank of India chuan vawiin aṭang khan ATM aṭanga ni khata pawisa lak chhuah theih zat Rs. 4500 ni ṭhin chu Rs. 10000 ah a tisang a, kar khat chhunga pawisa lak chhuah theih zat pawh Rs. 50,000 aṭangin Rs. 1,00,000 ah tihsan a ni.

Lirthei tlân dan tur
Traffic SP chuan thupek chhuahin Upper Khatla-a Bible House leh Baptist House kawt kawngpui a khîk belh avangin 407 truck leh a aia lian lirthei, Aizawl chhim lam pan turte chu Treasury Square to Sikulpuikawn via Upper Republic kawngpuiah tlân vek tur a nih thu a tarlang. Thupek hian city bus-te erawh a huam lo.

Vote hlutna zirtir
Kolasib-a CZ Higher Secondary School leh Diakkawn High School-ah, nimin khan Systematic Voters & Electoral Participation chungchang­ah 'Empowering Young and Future Voters' tih thupui hmangin zirlaite chu inthlan chungchang leh vote neih hlutna leh vote thlak a pawimawhzia zirtir an ni.

Hospital holiday
Mizoram sorkar chuan Civil Hospital-a thawkte tan thla tin Inrinni vawi hnihna zel chu holiday atan a puang a; Casualty erawh chu eng lai pawha hawn tho tur a ni.

Meth man
Champhaia Excise & Narcotics department mite chuan, January 14, 2017 zan dar 10:30 khan Ruantlang dáiah Methamphetamine mûm 2200 (gram 222.2) leh a neitua puh Lenpu (28) s/o Hlasue, Tamu, Myanmar nia insawi an man. Lenpu hi NDPS Act tlawhchhanin thubuai siamsak a ni a, Chief Judicial Magistrate thu angin Champhai District Jail-ah dah a ni.

Director thar
Health Services department director atan Mizoram sorkar chuan Mizoram Public Service Commission rawtna angin Dr F Lallianhlira a dah.