Mizo Carbon Ltd. thubuai ACB-in an la chhui zo lo

Industrial Growth Centre, Luangmuala Mizo Carbon Product Ltd.-in, Central Transport Subsidy (CTS) leh Central Capital Investment Subsidy (CCIS)-te dik lo takin a dil nia sawi chungchang chhuitu Anti Corruption Bureau (ACB) chuan preliminary inquiry an la zo lo.

Vanglaini palai zawh­na chhangin ACB director LH Shanliana chuan, Mizo Carbon Product-in subisdy an hmuh dan chu ngawrh taka chhui a nih thu a sawi a, "A chhui turin Deputy SP ruat a ni a, a pui turin officer pek a ni. Thil pawimawh hrang hrang an buaipui mek," a ti.

Mizo Carbon Product-in subsidy an hmuh danah thil dik tâwk lo a awm nia sawi a nih avangin June 13, 2016-a Council of Ministers ṭhukhawm chuan ACB chhuitir turin thutlukna a siam a; chumi bawhzui chuan chief secretary Lalmalsawma'n ACB hnenah Mizo Carbon Product chu chhui turin ACB a hriattir a ni.

ACB-te hian preli­minary inquiry-ah hian thubuai chu chhui zui zel tlak a nih leh nih loh an zir chiang ang a, an thil hmuh chhuahte chu Vigilance department-ah thawnin, Vigilance chuan chhui zui zel tlak a nih leh nih lohah te, criminal nge department inquiry-a kalpui tur tih­ahte thutlukna a siam ang.

Hetih lai hian, ACB hian kum 2017-ah com­plaint an la dawng lo a ni.