MLPC Act case 127 ziak lut
State Road Safety Council chu nimin khan Secretariat conference hall-ah Transport minister John Rotluangliana hoin an ṭhukhawm a, Road Safety Week hman dan tur an sawiho.
Transport Minister chuan, sorkar laipuiin kawngpuia himna a ngaih pawimawh thu sawiin, "Lirthei pung zelah leh duh anga kawngte a zau loh hlawm avangin tih tak zeta road safety kan ngaih pawimawh a ṭul tak zet. Supreme Court-in Road Safety Council din tura a tih avangin Mizoramah pawh December 20 khan din a ni," a ti.
Lirtheia chetsualna vanga thihna leh chhiatna thleng a hluar zel thu sawiin John Rotluangliana chuan, "Lirtheia chetsualna hriat tur a awm reng ṭhin avangin road safety hi ngaih pawimawh a ṭul hle a ni," a ti a; kum 2016 chhung khan kawngpuia chetsualna avangin Mizote zingah mi 52-in nunna an chàn thu a sawi.
Road Safety Week hi kuminah January 28 aṭangin Mizoram puma hman ṭan turin meeting chuan a rêl a; hmalakna tur hrang hrangte an sawiho nghal.
Meeting-ah hian, kawng sir leh péng ṭhuama lirthei dah ṭhinte chu Police lamin senghawi zel turin an rel a; traffic rules leh road sign inzirtirna uar lehzual a hmalak ni se, an ti.