Zoram thar danglam tak leh corruption do tak tak ngam kan siam ang - Zoramthanga

MNF chuan nimin khan kum 2017 atan an party pisa, Mizo Hnam Rûn an hawng a; hawnna inkhawmah MNF president Zoramthanga chuan, MNF-in kum 10 chhung sorkarna a lo siam tawhah tih dik tawk loh eng emaw zat an nei tih a pawm thu sawiin, mipui hnenah ngaihdam a dil a, "Zoram thar danglam tak leh corruption do tak tak ngam kan siam ang," a ti.

Mizo Hnam Run hawnna inkhawm hi senior vice president Tawnluia'n a kaihruai a; Zoramthanga chuan, kum 2018 inthlanpuiah sorkarna an siam theih ngei an beisei tih sawiin, "Kan hna hmasa berah Mizoram thar leh sorkar thar danglam tak siam kan tum," a ti a, chuta tan chuan Socio Economic Development Programme (SEDP) an siam a, chutah chuan mipui eizawnna ngêlnghet neih theih nan sorkarin chhungkaw pakhatah Rs. 3,00,000 aia tlem lo emaw, an mamawh zat ang zela buatsaihna tur sum a pe dawn tih a sawi.

Zoramthanga sawi danin, Mizoram tana thawk chhuak tawhte leh hnam tana martar chhungte zingah thil chi hrang hrang vanga pawl danga awm darh tawhte an awm a, chungte chu sáwm khawm lehin, Zoram thar din leh turin theihtawpa inlam khawm an tum a ni.

Congress sorkarah sum dinhmun a chhiat avangin sorkar hnathawkte'n harsatna naménlo an tâwk nia sawiin Zorama chuan, "Hlawh leh pawisa lak tur hrang hrang an la thei lo. Kum 1998-a MNF-in sorkarna a lak tirh khan sum dinhmun harsa em emin bul kan ṭan a, mahse, kan sorkar chhung zawng khan hlawh leh sum lamah harsatna awm hauh loin kan kalpui thei," a ti.

MNF President chuan, ram rorelna fel leh thianghlim a awm theih nan corruption nasa takin an do dawn tih sawiin, "Chief Minister aṭanga a tê ber thlenga chhui thei tur kan din ang. Corruption tihbo tumin beih pui kan thlak dawn a ni," a ti a; kum 10 opposition-a an awm chhungin thil tam tak an zir tih sawiin, sorkarna an chan leh hunah chuan nasa takin an danglam tawh dawn niin a sawi.

Zu leh ruihhloin nasa takin Mizoram a tibuai nia sawiin, Zorama chuan, "Mi tam takin an thih phah tawh. Zu zawrhte hi titawp vekin ruihhlo dang pawh tibo turin theihtawp kan chhuah ang. Zu leh ruihhloin a tihbuaite chhanchhuaka tidam leh turin centre lian tam siamin, tih tak zetin beihpui kan thlak dawn a ni," a ti.

Lungleia MNF sub-headquarters pisa Mizo Hnam Rûn pawh nimin vek khan hawn a ni a, Lunglei MNF sub-headquarters president Lawmawawma Tochhawng-in thu a sawi a ni.