Bible House tihruah ṭan a ni

Aizawl DC chuan nimin khan thupek chhuahin MG road, Khatla-a lei a khik avangin Bible House chu a rang thei ang bera tih ruah tur nih thu a tarlang. Bible House-a bungruate chu nimin khan thiarchhuah ṭan a ni.

Aizawl DC-in order a chhuah dan chuan, Bible House bula GAD building ruak chu tumahin an luah tur a ni lo. PWD hnuaia Hazard Safety Cell chu Bible House leh GAD building hi a rang thei ang bera an dinhmun enfiah tura tih an ni a, an endikna aṭangin rawtna an siam ang. UDPA dept. chu lei khikna bawr vela lei dinhmunte zir chiang tura tih an ni.

Bible House-ah hian chhungkaw pathum awmin, mi 19 an chêng mek a, an vaiin Bible Society of India-a thawkte an ni.

Bible House kawt lei khì hi December 6, 2016-ah hmuh ṭan a ni a, December 7 zinga UDPA Minister leh sorkar official-te'n an enfiah hnuah, a thlanga State Convention Centre sakna tura tura lei laih chu chawlhsan nghal tura tih a ni.

Hetihlai hian Aizawl DC-in order a chhuahah chuan retaining wall leh column siam hnathawh chu rang taka chhunzawm phal a ni a, mahse hmanraw lianpui pui hman erawh khap a ni.

MG road hi January 14 leh 15 lamah pawh a chêt belh leha hriat a ni a, January 14 khan lei hnuai aṭangin tui a pût chhuak ṭan a, PHE pipe (connection pipe) a inpawt dawk nual tawh niin PHE hotute chuan an ring. PHE hotute chuan, leia phûm connection pipe hmangin tui an pe ngam tawh rih lo tih sawiin, tui an pek dawn pawhin kawngpui chungah pipe thar kaltira pek a ngaih dawn thu Vanglaini an hrilh.