Congress party-in pawisa tihthih avangin RBI lakah lungawi lohna an lantir dawn

Congress party chuan Rs. 500 leh Rs. 1,000 note hlui tihthih a nih vanga lungawi lohna an lantirna kal zelah, Mizoram tana AICC convener Nabam Tuki chuan, India rama RBI office 33-ah vawiin hian lungawi lohna lantir an tum thu a sawi. Aizawla RBI office-ah pawh lungawi lohna hi lantir a ni dawn.

Arunachal Pradesh MLA ni mek leh chief minister hlui Nabam Tuki hian nimin khan Congress Bhavan-ah thuthar thehdarhtute kâwmin, pawisa note tihthih chu ram pumin a tuar hle niin a sawi a, "Pawisa tihthih vanga lungawi lohna lantirna thawh hnihna kan kalpui mek a. He thil hi mipuite'n kan tuar a, kan pawisa ngei ngei pawh kan kutah a awm thei lo. Kan economy pawhin a tlakchhiat phah ngei ang," a ti.

Pawisa tihthih chu a bik takin thingtlang mi, an pawisate bank-a dah ngai lote'n an tawrh nasat thu sawiin Nabam Tuki chuan, "Thingtlang hmun tam takah chuan bank-ah pawisa dah loin, an neih ang ang an kawl mai ṭhin. Pawisa note tihthih hi an tuar nasa hle a ni," a ti a; pawisa note tihthih vangin mi 100 chuangin nunna an chàn phah tawh niin a sawi.

Nabam Tuki chuan, pawisa tihthih a nih avangin mi tam takin an hna an chàn phah bawk nia sawiin, "Pawisa lak chhuah theih zata bituk hi company lian tak takte tan engmah tham a ni lo. Company tam takin an hnathawkte an bàn phah a, hna zawnga state danga kal chhuakte pawh an ramah an kîr leh tawp a ni," a ti.

Nabam Tuki sawi danin, Congress party chuan vawiin hian India rama RBI office 33-ah lungawi lohna an lantir dawn. Lungawi lohna lantirna chhan tur chu pawisa tihthih chungchangah RBI chu a tih tur ti tâwk loa an hriat vang leh mipui buaina chingfel tura hma la ṭha tawk loa an hriat vangte a ni.

Congress party chuan RBI lakah thil phût pahnih an nei a, chu'ngte chu - pawisa lak chhuah theih chin bituk titawp tur leh digital transaction-a sum chawi (charge) awmtir lohte a ni.

RBI hian Mizoramah chuan Aizawlah sub-office an nei a, October 15, 2015 khan RBI governor Dr Raghuram Rajan leh chief minister Lal Thanhawla ten an hawng. Mizorama Congress party-te chuan Dawrpuia RBI sub office-ah lungawi lohna an lantir dawn a ni.