Kau-Tlabung leh Tuipangluia thutlukna Gauhati High Court-ah khin lêt a la ni lo

Kau Tlabung Mini Hydel Project (MHP) leh Tuipanglui MHP thubuaia Aizawl District & Session Court thutlukna chu Mizoram sorkarin Gauhati High Court (GHC), Aizawl Bench-ah khin lêt a tum a, mahse, he thu ziah lai thleng khian an la khing lêt lo.

Vanglaini palai zawhna chhangin Anti Corruption Bureau (ACB) hotute chuan, thubuai khinletna atana High Court-a sorkar ukilte'n document pawimawh an dil angte chu an pek vek tawh thu an sawi a, "Document hi ṭum hnih min dil a, ṭum khatna kan pek hnuah a dang min rawn dil leh. Ṭum hnihnaa min rawn dil hi chu kan neih lâwk lohte a ni a, kan zawng khawm a, kan pe vek tawh," an ti.

Gauhati High Court-a sorkar ukilte chuan, High Court-a Kau-Tlabung MHP leh Tuipanglui MHP thubuaia Court hniam zawk thutlukna khing lêt tur hian tihfel ngai hrang hrangte an buaipui mek thu sawiin, khin letna an thehluh thuai theih an inbeisei thu Vanglaini an hrilh.

Kau-Tlabung MHP leh Tuipanglui MHP thubuaiah hian Special Judge (PC Act) Lucy Lalrinthari chuan October 27, 2016 khan thutlukna a puang a; eiruknaa inhnamhnawiha puhte chu thiam a chantir a, thubuai chhuitute'n finfiahna an neih loh thu a tarlang.

Aizawl District & Session Court-a sorkar ukilte chuan, Special Judge thutlukna chu a dik tawk loa an hriat avangin, dik tâwk lo an tih hrang hrangte tarlangin Gauhati High Court-a khing lêt turin sorkarah rawtna an thlen. Ukilte rawtna chu sorkar thuneitute'n an zir chian leh a ngaihtuah hnuah November 21, 2016 khan High Court-a khing let tura rawtna an pawm a ni.