Kawnpuiah Mizo Traditional Games khar

Directorate of Sports & Youth Services leh Ministry of Tribal Affairs hnuaia Vanbandhu Kalyan Yojana ṭang-kawpin, Kawn­pui Hockey Academy khel­muala Mizo Traditional Games, 2017 an buatsaih chu nimin khan khâr a ni a; bialtu MLA Hmingdailova Khiangte, parliamentary secretary (SYS)-in a hmanpui.

Hmingdailova Khiang­te chuan, ṭhang­tharte'n Mizo pipute infiam dan leh hnam ziaráng an theihnghilh mai loh nana SYS department-in traditional games an buatsaih chu lawmawm a tih thu sawiin, "Nun dan phung changkang zelah hnam ziarâng chawi nun nachang kan hriat zel a pawimawh a, kan pipute nun ze mawi kan chhawm nun zel a ṭul a ni," a ti.

Mizo infiamna chi hrang pariat hmangin intih­siak a ni a, mipa puitling tan inbuan, insuknawr leh insaihruipawhah intihsiak­na neih a ni a; hmeichhe tan ketaminu intlansiak leh kâwi inkahsiakah intihsiak niin, naupang tan kalchhet kal, arpa insual leh sairawkherh perh hmang intihsiak a ni thung.