Mizoram SSA-a hnathawkte hlawh pek duh loh a awm lo - Project Director

Mizoram SSA state project director (SPD) Lalhmachhuana chuan, Mizoram SSA-in sum a neih ang ang hmangin SSA-a thawkte hlawh pek a nih thu leh hlawh pek duh loh a awm loh thu a sawi a, "Cheng nuai 1441.31 leh SSA sum neih sa hmangin June leh July 2016 thla hlawh pek a ni," a ti.

SSA SPD Lalhma­chhuana hian nimin khan a pisaah thuthar thehdarhtute kawmin, SSA sum dinhmun a hrilhfiah a; tun hnaia social media lama SSA-in Finance department-a sum an dilna lehkha copy darha hlawh tur ziahnaah August leh September tih inziak chu SSA lam ziah a ni lo tih sawiin, SSA-in sum an dilna copy pawh press mite a pe.

Lalhmachhuana sawi danin, SSA-in kum 2015-16 chhunga sum hman bàn (balance) nuai 563.92 a nei a; Central-in 2016-17 kum tirah hman hmasak atan May 12, 2016-ah cheng nuai 2265 a rawn pe a, chu chu SSA account-ah July 4, 2016-ah a lut. Central adhoc release leh opening balance chu nuai 2828.92 a ni.

Central aṭanga nuai 2265 hmuh a nih hnu­ah May 26, 2016-ah state matching share an dil nghal. Finance department-in a pek hmain SSA-a thawkte chu thla hnih hlawh (April leh May)pek a ni a, hlawh bakah administrative cost, hostel enkawlna leh vohbikte zirna atan July 11-ah cheng nuai 1813.99 pek chhuah a ni.

State matching share chu Finance department-in August 5 leh 19-ah nuai 612.52 a pe chhuak a, Mizoram SSA account-ah August 30 leh September 23-ah a lut. Matching share nuai 612.52 an hmuh hnu leh hlawh leh thil dang atana July 11-a nuai 1813.99 an pek chhuah hnua SSA account-a sum awm chu nuai 1627.45 a ni.

September 6-ah a vawi hnihna atan district hrang hrangah school maintenance grant leh school grant nuai 157.49 an pe chhuak a; a vawi thumna atan September 12-ah school grant leh maintenance grant atan nuai 149.195 an pe chhuak leh a; October 4-ah a vawi lina atan naupang harsate sikul luh theih nana SSA enkawl hostel-te enkawl nan leh administrative cost atan nuai 123.43 an pe chhuak leh bawk.

Social media-a tarlan, cheng nuai 1441.31 chu first instalment a ni a, September 29-ah sanction an hmu. Nuai 1441.31 pe chhuak turin SSA-in October 6-ah proposed expenditure an siam tih sawiin, Lalhmachhuana chuan, "Hetih hun lai hian June 2016 hnu lama hlawh bat mek a ni a, proposed expenditure hi closing balance awm mek leh nuai 1441.31-in a daih tawk tur June leh July thla hlawh hmanna tura dil a ni," a ti.

SSA SPD chuan, sum awm sa hmangin SSA-a thawkte June thla hlawh tur cheng nuai 834.07 chu October 14-ah district hrang hrangah pek a ni tih sawiin, "Nuai 1441.31 hi November 22-ah SSA account-ah a lut chauh a, sum balance awm sa chu June 2016 hlawh atan pek chhuah a nih tawh avangin July 2016 thla hlawh chauh a daih a ni," a ti a; November 22-a nuai 1441.31 an dawn aṭangin nuai 847.20 chu November 23-ah hlawh atan district-ah pek chhuah nghal a ni a, July thla hlawh pek chhuah a nih hnuah SSA account-ah nuai 658.98 chiah a awm tawh avang­in thla dang hlawh a daih tawh lo tih a sawi.

Lalhmachhuana chuan, SSA-in Finance-a sum (nuai 1441.31) a dilna lehkha copy, social media-a tarlan chu June leh July thla hlawh tur leh thil dang atana hman tura tih a nih thu sawiin, "Lehkha copy-ah mi tute'n emaw August leh September an ziah chawp avangin August leh September hlawh tur dilna angin a lan phah a. June leh July kal kâna August elh September thla hlawh tur dil thu a awm lo," a ti.

December 8, 2016-a Assembly session-ah School Education minister H Rohluna'n thu dik lo a sawi anga mi ṭhenkhatin an puh chungchangah SSA SPD chuan, "Session lai hian SSA-a thawkte hlawh tur kan pek theih ang ang kan pe tawh a. Second instalment dilna pawh September thlaah Central-ah kan thawn tawh," a ti a; sum an dil mek avangin Minister-in thu dik tak a sawi thu a sawi.

Lalhmachhuana chuan, SSA sum tur second instalment pe chhuak turin Central an nawr reng thu sawiin, "Cheng nuai 70 chuang hret min pek an tum niin kan hria a, January 19-20 velah an sanction hman kan beisei. Nuai 70 chuang kan hmuh chuan hlawh la pek loh zawng zawng kan pe thei ang," a ti