Central Instrumentation Laboratory hawng

Agriculture minister R Lalzirliana chuan, nimin khan KVK, Lengpuiah Central Instrumentation Laboratory a hawng a; Mamit district-a khaw 10 thlan chhuaha khuai khawitute hman tur bungrua a sem nghal.

Agriculture Minister chuan, KVK hmalaknate chu ṭha hle mahse kut hnathawktu tam tak, a bikin thingtlang lo neitute chhawr ṭangkai tur erawh chuan puanzar a hlawh tâwk lo tih a sawi a, "Ku thnathawktute chhawr ṭangkai tur thiamna leh demonstration farm a hlawhtlinna hmuh chhuahte chu lo leh huan neitute hriatah puangzar tam a pawimawh," a ti.

Agriculture-ah Mizoramin mithiam tam tak an chhawr tawh ṭhin thu sawiin R Lalzirliana chuan, "Hmasawnna kawngah erawh mipui beisei hmuh tur a awm lo. Hemi kawngah hian Agriculture mithiamte chiah mawhchhiat theih an ni lo a, lo/huan neitute pawhin an ṭhahnemngaihna leh an taimaknate peipun an mamawh," a ti a; sorkar aṭanga ṭanpuina chu eikhawp thar chhuahna a nih nghal mai loh thu a sawi.

R Lalzirliana chuan, Mizoramah research centre ṭha tam takte mipuiin an chhawr loh chhan pakhat chu deputation-a hnam dang mithiam rawn lutte'n Mizo ṭawng an thiam ṭhin loh vang a nih thu a sawi a, "Agriculture-ah phei chuan hnam dang mithiam chhawr a ngai a nih pawhin pawl 6 zirlai Mizo Ṭawng ang chin tal an thiam a ngai. Agriculture thiamna mamawhtu lo neitute tan Mizo ṭawnga biak theih si loh mithiam pui pui chhawr ngaihna a awm lo," a ti.

NABARD general manager DK Mishra pawhin thu sawiin, "Hun rei lote chhungin lirthei kal theihna feh kawngte pawh tam tham tak sial a nih theih nan Mizoram sorkar nen hmalak tum a ni," a ti a; agriculture thila hmalakna thar leh hlawk tura ngaihahte NABARD chu a inhawn thu a sawi.

Inkhawma tarlan danin, Central Instrumentation Laboratory building sakna atan hian RKVY sum nuai 20 leh laborartory bungraw leina atan nuai 140.95 hman a ni.