KHAWTHLIR

MUP jubilee
Mizoram Upa Pawl (MUP), Durtlang unit chuan nimin khan Durtlang MC Hall-a MUP kum 60-na, diamond jubilee an lawm a, minister Lal Thanzara'n a hmanpui. Bawngkawn unit MUP pawhin nimin khan MUP diamond jubilee lungphun an siam chu Aizawl deputy mayor Lalringliana'n a hawng. Serchhip Vengchung MUP pawhin nimin khan Zoluti Hall-ah MUP diamond jubilee hi an lawm a ni.

Festival-ah tel
National Youth Festival, Haryana-a neih mekah Nehru Yuva Kendra Sangathan (NYKS), Mizoram aṭangin mi pakua an tel.

Lirthei chesualah thi
Thawhṭanni zan, zanlai pelh hnu, dar 1 vel khan NH-54, Phunchawng leh Sairang inkarah 709 truck chesualin, kawng thlangah a lum a, a khalhtu R Zamawia (45) leh handyman Lalremthanga (19), Govt.Complex veng ve ve chu a hmunah an thi. Thu dawn danin, truck hi RTP Enterprise ta a ni a, Mamita bungrua an dah zo, Aizawl pana an lêt leh lam niin, driver leh handyman chiah an chuang a ni.