Inpekna thûk zawk nena hna thawk turin MPC President-in Mizoram sorkar a ngen

MPC chuan nimin khan kum 2017 atan an party pisa an hawng a; hawnna inkhawmah an president Lalhmangaiha Sailo chuan, kum thar a nih angin inpekna thûk zawk nena hna thawk turin Mizoram sorkar a ngen.

Lalhmangaiha Sailo chuan, "Sorkar sum indaih lohna leh financial management thiam tawk loh vanga mipuiin harsatna nasa tak kan tawh phah ṭhin leh administration leh dan leh thupek kalpui fuh tawk lohna vanga mipuiin kan dikna leh chanvo kan luah zo lo ṭhin hi pawi ka ti em em a ni. Kum tharah hi chuan inpekna thûk zawk nen ram leh mipuite hmakhua ngaia ram rawngbawl hna thawk turin Mizoram sorkar ka ngen a ni," a ti.

Congress leh MNF party-te'n kum 30 chhung Mizoram an hruainaah mipui beisei an phâk lo nia sawiin MPC President chuan, "Heng party pahnihte hian kan ram hi kaihruai hrih tawh lo se tih hi mipui tam zawkte duh dan a ni. Mizoramin hmasawnna ruhrel din kawngah kan la thleng sang lo hle," a ti a; Mizo mipuite'n sorkar danglam, Zoram mipui tana thawk tak tak thei tur an siam a ngaih tawh thu a sawi.

Mizoram kaihhruaina hna ṭhalaite kuta hlan thiam a hun tawh nia sawiin Lalhmangaiha chuan, "Mizo ṭhalai thiamna sang tak tak neite hi ram hruainaah tun aia nasa zawk leh ṭangkai zawka an inhman theihna turin MPC chu zau takin a inhawng reng. Hmeichhiate dinhmun hi politics kaltlanga siamṭhat kan tum tlat a, Mizoram political history kan thlir let chuan MPC hi Mizoram political party-te zingah hmeichhiate hmang ṭangkai ber kan ni," a ti.

MPC President chuan, mipui beiseina tihhlawhtlin tumin ram veitu, ram ṭhatna tura mi ṭhahnemngai tak tak hminghliauna leh sûlhnu pawr chhui tur la hnutchhiah ve lote nen hrui khat vuanin an intèl khawm thu sawiin, "Kum 2018 inthlanpui kan hmachhawn turah mipui sorkar, mipuite siam, mipui ta din turin theihtawp chhuahin hma kan la zel dawn," a ti a; an thil tum a hlawhtlin theih nan mipui ṭawiawmna a ngen a ni.