Sorkarin ACB kut a phuar em ni? - MPYCC

Congress ṭhalai, Mizoram Pradesh Youth Congress Committee (MPYCC) chuan thuchhuah siamin, Wg.Cdr. J Lalhmingliana, Civil Aviation Wing-a principal consultant laka April 26, 2019-a Mizoram Chief Minister leh Mizoram Lokayukta-a complain an thehluh chu bawhzui mumal a ni lo tih an tarlang a, "MNF sorkarin ACB kut a phuar em ni?" an ti.

MPCC tarlan danin, J Lalhmingliana hian April 9, 2019 khan helicopter hman (hire)-na leh consultancy firm pakhat aṭanga sum a hmuh belhkhawm Rs. 56,42,720 te, April 10, 2019-a consultancy firm aṭanga sum hmuh Rs. 45,35,300 leh C Ngunlianchunga, MLA-in helicopter a hman (charter)-na man Rs. 1,20,000 (cheque no. 435734)-te chu ama mimal bank account, ICICI Bank account no. 240701500605-ah a dah lut a; a vaiin Rs. 1,02,98,020 a ni.

Helicopter hmanna man chu Pawan Hans hnena pek tur a ni a, consultancy firm sum pawh hnathawh an zawh chiah loh pawhin Civil Aviation Wing-in an kawl ang a, an zawhfel hunah pek tur nia hriat a ni.

MPCC chuan, sorkar sum tam tham tak mimal bank account-a dah chu thil dik lo lian tak, Financial Rules kalh tlat a nih thu sawiin, "Fundamental Rules, Financial Rules leh DPAR OM no. G11021/2-PAR(ARW) dated 7th August, 2008 kalh tlat a ni a, corruption dik tak a ni," an ti. J Lalhmingliana appoint-ment order no. D26017/1/105-GAD/PT dated 23rd January, 2019 pawh a dikhlel nia sawiin MPCC chuan, "Civil Aviation Wing hi GAD hnuaia wing pakhat a ni a, head of department chu GAD Secretary a ni," an ti a; head of department anga principal consultant J Lalhmingliana chhàl (declare) a ni chu thil dik lo a nih thu an sawi.

Congress ṭhalaite chuan J Lalhmingliana chu a rang thei anga chhui a, corruption case siamsak tur leh a hna aṭanga bàn turin Chief Minister Office-ah lehkha an thehlut a, Mizoram Lokayukta-ah complaint an thehlut bawk.

Chief Minister hnena lehkha thehluh chuan thâwm a nei lo a; Lokayukta erawh chuan chhui zui tlakah ngaiin, Mizoram Lokayukta Act, 2014 Section 19(1) tlawhchhanin ACB hnenah preliminary enquiry ti a, thla khat chhunga Lokayukta-a report thehlut turin a hriattir a ni.

Thla khat chhunga report thehlut turin Lokayukta-in ACB a hriattir laiin, lehkha thehluh aṭanga thla riat a ral hnuah pawh thâwm a la awm lo tih sawiin MPYCC chuan, "Kan ngaih a ṭha tawh lo hle. MNF sorkar term hmasaa police kut phuar tlat kha an la phelh fel lo a, thil dik lo chhui tura din ACB kut an la phuar tlat a ni tih hi kan rin dan a ni," an ti. Sorkar sum dik lo taka mimal bank account-a dah chungchang chu a rang thei ang bera chingfel turin sorkar an phût a ni.