Health dept.-in Covid-19 do nan Cheng nuai 2,127 an hmu tawh
Health & Family Welfare minister Dr R Lalthangliana chuan nimin khan Secretariat conference hall-ah thuthar thehdarhtute a kâwm a; swab sample ṭul zualpuite chu tun kar chhungin endik zawh hman beisei a nih thu a sawi. Covid-19 dona atan Health department chuan cheng nuai 2,127 a hmu tawh a ni.
Dr R Lalthangliana chuan, Covid-19 chu natna chimawm tak, hmuh theih si loh a nih avangin invèn kim a harsat thu sawiin, "Hei vang hi a nih ka ring, USA leh Europe-a sorkar chak tak takte pawhin tihngaihna vak an hre lo. Chutiang lo do chu keini ang state tan chuan a huphurhawm khawp mai. Tih dik tâwk lohte pawh a awm ang," a ti.
Swab sample tam zawk endik a nih theih nan thehtawp an chhuah tih sawiin Health Minister chuan, "Kháwl tharte ngaihtuah belh a ni a, installation tih chhung kar khat vel khaihlak deuh laite a awm. Theih chin chinah theihtawp kan chhuah a, chutih laiin, sawiselnate a awm a, ngaihdam ka dil a ni," a ti a; tun kar chhungin swab sample endik ṭul zualpui zawh hman an inbeisei thu a sawi.
Dr R Lalthangliana chuan, Covid-19 dona kawngah sorkar, kohhran, pawl hrang hrang leh mipui thawhhona a ṭhat thu a sawi a, "Thawhhona a ṭhat avangin Covid-19 do kawngah a ti ṭha berte zingah kan tel thei a ni," a ti.
Health Minister chuan, Covid-19 dona atana sum leh pai an mamawh ang Chief Minister-in a pek zel thu sawiin, "Kan CM kaihhruainaah kan hlimin kan lawm a, Health department hmingin lawmthu ka sawi a ni," a ti a; Finance department official lam pawhin sum mamawh an dilte an hriatthiampui ṭhin thu a sawi.
Thuthar thehdarhtute kawmnaah hian Covid-19 testing laboratory din a nih theihna atan committee dina member Lunglei South bialtu MLA Dr K Pachhunga leh Aizawl South-III bialtu MLA Prof. F Lalnunmawiate chuan RT-PCR khawl chungchang an sawifiah a ni.
Covid-19 dona atan sum hmuh dan sawifiahtu Health secretary H Lalengmawia sawi danin, Covid-19 dona atana state leh central aṭanga sum an hmuh tawh chu cheng nuai 2127 a ni. Pawisa hi a tam zawk chu hman a ni tawh a, la hman lohte pawh bungraw chah mek a thlen huna pek turte a ni hlawm.