Vairengte zaua Assam police duty post siam Mizoram sorkarin a ṭhiat dawn lo
Assam police-te'n Vairengte Mautui Zaua Thangseii huana kumin kum tir lama duty post an siam chu Mizoram sorkarin a ṭhiat dawn lo. Assam police-te chu Mautui zauah hma thar lak a phalsak lo thung.
Mautui zaua huan neitu Thangseii chu a hnathawkte'n a huanah Assam police-in kawng laih an tum tih an hrilh avangin tun hnai khan a huanah a kal a, duty post en chian an tum chu Assam lamin an lo hau a ni. He thil thleng avang hian May 6, 2022 khan Vairengte SDO (Civil) Thianlala leh SDPO H Lallungmuana hoin police eng emaw zat chu Mautui zauah an kal.
Mizoram sorkar official-te an kal lai hian duty post-ah Assam police pasarih vel an awm. Assam police-te chu an duty post panna tur kawng laia camp saa awm ngheh an tum nia hriat a ni a, chu chu Mizoramin a remtih dawn loh thu Vairengte SDO chuan a hrilh.
Assam ho chuan an duty-na bula civil mi kal Mizote chu a huan neitute an ni tih an hriat loh vanga hau an nih thu leh huan neitu an nih chuan harsatna a awm loh thu an sawi a; harsatna awm zui loin Mizoram sorkar official-te chu Vairengte-ah an kîr a ni.
Vairengte aṭanga thu dawn danin, Thangseii huan aṭanga hla vak lo, H Lalrinawma huanah Mizoram police an duty mek a, police pasarih vel chiah an duty avangin May 6, 2022 tlaiah police dah belh nghal a ni.
Assam police lam chuan Thangseii huan aṭanga hla lutuk lo, an ram chinah camp an nei a, chuta ṭang chuan Thangseii huana an duty post-ah duty turin an inkal chhâwk ṭhin.
May 7, Inrinni khan Mizoram leh Assam sorkar official-te chu an inbe leh a, Assam police duty post chu ṭhiah rih loh turin thutlukna an siam a, inthiarna sak remtihsak an ni bawk.
Thangseii huan piahah Mizo dang pahnihin huan an nei a, Thangseii leh mi dang pahnihte chu an huana an kal theihna turin ruahmanna siam a ni.
Huan neitute chu identity card siamsak an ni dawn a, chu chu Dholai OC-in pein, ID card neite chu zalên takin mahni lo leh huan enkawl chhunzawm phalsak an ni dawn. Huana hna thawk tur ni lo, ramkal satliah veivâk erawhin tlawh lo se an duh thu Assam police-te chuan an sawi.
Huan neitu Thangseii sawi danin, a huanah hian January 2022 vel khan Assam police-te'n duty post an sa a, dam lohna avanga anmahni an kal ngai loh avang leh an hnathawkte'n an hrilh loh avangin an hre mai lo a, tun hnai khan an hre chauh a ni. Assam hian an duty post sak nan kuhva puitling pahnih an kit niin a sawi.
An huan atan Mizoram sorkarah LSC an neih thu sawiin Thangseii chuan, "Assam police-te kan huana an duty hi nakin zel atan a ṭhat dawn loh avangin chhuak ngei turin ka duh," a ti.