Vawiinah MADC vote chhiar dawn

Mara Autonomous District Council (MADC)-a member of district council (MDC) inthlan­pui, May 5, 2022-a neiha vote tlate chu vawiin chawhma dar 10 aṭangin chhiar a ni dawn a, vote chhiar turin engkim peih a ni.

MADC inthlana vote tlate chhiar tur hian Siaha district election officer Lalsangliana, district bawrhsap pisaah nimin khan vote tlate chhiartu tur pàwhna (counting official randomisation) neih a ni.

Vote chhiarna atan counting hall pahnih siam a ni a, dawhkan panga ve ve dah a ni. Round khat-ah counting table 10-te chu a rualin hman a ni dawn lo a, round 13-ah vote tlate chu chhiar zawh theih beisei a ni.

Round khatnaah polling station (PS) paruk, round hnihnaah PS pariat, round thumnaah PS pasarih, round linaah PS paruk, round nganaah PS pali, round ruknaah PS paruk, round sarihna leh riatnaah PS pasarih ve ve, round kuanaah PS panga, round 10-naah PS paruk, round 11-naah PS pasarih, round 12-naah PS pariat leh round 13-naah PS pali chhiar a ni ang.

Tarlan tawh angin, May 5, 2022 khan 12th MADC General Election neih a ni a, MDC bial 25-ah candidate 85 an awm. Vote nei mi 42,342 zinga mi 36,119-in vote an thlak a, vote tla hi 85.30% a ni.