2022-ah ASF vangin vawk 1,983 thi tawh

Kumin 2022 chhungin vawk pùl hri, African Swine Fever (ASF) vangin Mizorama khua/ veng 31-ah vawk 1,983 a thi tawh a, vawk 1,201 suat a ni tawh.

Mizoramah December 30, 2021 hnuah hun eng emaw chen ASF vanga vawk thi hriat tur a awm lo a, February 4, 2022 khan Champhaiah ASF vanga vawk thi a awm leh ṭan. Kumin bikah May 7, Inrinni thleng khan district paruk - Aizawl, Lunglei, Champhai, Mamit, Saitual leh Khawzawl district-a khua/ veng 31-ah ASF a léng tih finfiah a ni tawh.

ASF lènna khua/ veng 31 zingah vawk 373 thih tawhna Aizawl district-a Darlawn chu vawk thi tamna ber khua a ni a, Champhai district-a Farkawn khuain dawtin vawk 344 a thi tawh. Farkawn khua hi kumina vawk suat tamna ber a ni a, nimin thleng khan vawk 467 suat a ni tawh a ni.

Aizawl, Champhai, Saitual leh Khawzawl district-ahte ASF lenna hmun nia rinhlelh, la finfiah loh khua/veng 21 a awm a, chu'ng khua/ vengahte chuan vawk 473 a thi tawh a, vawk 295 suat a ni tawh bawk. ASF lênna leh rinhlelhna hmuna vawk suatte chu a vaiin 1,201 a ni.