Damdawi lama thawktu leh hmanraw indaih lohna ngaih pawimawh ber a ṭul - Dr R Lalthangliana

Ministry of Health & Family Welfare leh Gujarat sorkar ṭangkawpin 14th Conference of Central Council of Health and Family Welfare (Swasthya Chintan Shivir tia sawi bawk) an buatsaih chu May 7, Inrinni khan a ṭiak. He hunah hian Health minister Dr R Lalthangliana telin, damdawi lama thawktu leh hmanraw indaih lohna ngaih pawimawh hmasak ber a ṭul thu a sawi.

Dr R Lalthangliana chuan, health infrastructure tihṭhat a pawimawh thu leh Mizoram leh India ram hmun hrang hrangah doctor, nurse leh health worker indaih lohna a nasat thu a sawi a, "Thingtlang kilkhâwr leh hmun hla zawka chengte'n damdawi a hun taka an hmuh zung zung theihna turin ruahmanna kan siam a ngai," a ti.

Hripui lêng hmachhawn leh hun atan inpuahchah ṭhat a pawimawh thu sawiin R Lalthangliana chuan, "Thawktu leh hmanraw indaih lohna hi kan ngaih pawimawh hmasak ber a ngai a ni," a ti a; hripui léng chu khuarel chhiatna chi dang nen a inan loh avangin central leh state-a ministry/department hrang hrangte thawhho dan tur mumal taka ruahmanna siam lâwk a ṭul thu leh, sorkar laipuiin a rang lamin hma la se a duh thu a sawi.

Dr R Lalthangliana chuan, Mizoram sorkarin hriselna kawngah hma a lak dan sawiin, "Sub-centre, health & wellness centre ṭha taka kalpui a ni a, Mizoram sorkarin state danga awm ve lo health clinic a ruahman a, health clinic 200 vel kan nei," a ti.

Mizoram Health Minister tarlan danin, NITI Aayog-in kum 2017 aṭanga endikna a kalpui khaikhawmna, Healthy States, Progressive India-ah Mizoram chu state tê zingah pakhatna a ni a, infant mortality rate chu kum 2009-ah 36 a nih laiin, kum 2019-ah chuan 3-ah a tla thla tawh a ni.