Shillong-a Mizo zirlai tan debate buatsaih

Mizo Student Union, St Anthony's Mizo department leh Mizoram Youth Commission (MYC)-te ṭangkawp chuan May 6, 2022 khan Shillong-a Mizo zirlaite pualin St Anthony's College auditorium-ah Inter-College Debate an buatsaih a, MYC chairman Dr Vanlalṭanpuia, MLA-in a hmanpui.

Inter-College Debate thupui chu 'Active participation of the youth in politics is necessary for the transformation of nation and society' tih a ni a, Shillong-a college pakua an tel. St Edmunds College chu pakhatna an ni a, Union Christian College leh St Dominic College-te chu pahnihna leh pathumna an ni.

Dr Vanlalṭanpuia chuan, zirlaite chu ram leh hnam tana theihtawp chhuah turin a sáwm a, "Mizoram tana hlawhtlinna paw chhuak tur leh all India service-a lut thei turin bei ang che u," a ti a; zirna tluang pangngai piah lamah IIT, IIM leh proffessional course hrang hranga zir tlaka inchher hriam turin a chah.

MYC Chairman hian May 6 vek khan Indian Council of Cultural Relations (ICCR) regional director Dr Munish Singh chu Mizoram House-ah a kâwm a, Mizorama ICCR nen ṭang duna kumin kum tàwp lama Korean Cultural Exchange Centre, New Delhi, MYC leh ICCR-te'n cultural exchange programme buatsaihna tura hmalak dan turte an sawi.

North Eastern Council (NEC) secretary K Moses Chalai leh deputy secretary L Beimopha te pawh an pisaah a kâwm a; NEC-in Covid-19 hripui léng avanga migrant worker-te tana skill training buatsaihna tur sum a pek avanga lawmthu hrilhin, MYC mamawhte a thlen nghal a ni.