Bairabi kudama kuhva rah Phurh chhuah ṭhin niin hria

Bairabi North-a bamboo industry kudam pakhata kuhva rah dahte chu tun hnaiah a khát tâwkin phurh chhuah a ni ṭhina hriat a ni a; April 23, 2022, Inrinni zan khan phurh chhuah ṭhen a lo ni tawh bawk.

Kuhva rah a awm tih hmu chhuaktu Zampui­manga Group YMA hruai­tute chuan, kuhva rah chu phurh chhuah leh ṭhin a nia an hriat thu sawiin, "Kan veng reng hman lo a, a zat chiah chhiar a ni bawk si lo. Phurh chhuah a ni leh ṭhin tih thâwm tualchhung aṭangin kan hria. Hma la tura kan beisei Police leh Customs lamin an tih tur ni loah an ngai ve ve si a, kan tan chuan tihngaihna vak a awm tawh lo a ni," an ti.

Zampuimanga Group YMA hruaitute chuan, kuhva rahte chu Zophai police checkgate kaltlang lo chuan phurh chhuah theih nia an hriat loh thu sawiin, "Checkgate an paltlang ngei em tih hre lo mah ila, a kaltlang a ngai a ni," an ti a; April 23, 2022 zana an phurh chhuah erawh chuan police checkgate a paltlang ngei tih an hriat thu an sawi.

Tarlan tawh angin, Central YMA hruaitute chuan April 30, 2022 khan Bairabi North-a bamboo industry chu an tlawh a, Zampuimanga Group YMA hruaitute'n lo dawngsawngin, Bairabi South Branch YMA Office-ah kuhva rah chungchanga hmalak zui zel dan tur an sawiho a ni.

CYMA president R Lal­ngheta chuan, YMA chu kuhva ro chungchangah CYMA chu a dinna ngaiah a la ding reng tih sawiin, CYMA-in tih dan tur a rèl fel hma chuan Myanmar aṭanga kuhva ro tawlh tawh lo turin mipui a chah a ni.