Naupang kum 12-14 inkar zingah Mi 31,018-in Covid vaccine la tawh

Mizoramah May 6, Zirtawpni thleng khan mi 8,50,283 hnenah Covid-19 vaccine dose 15,80,237 pek a ni tawh a; naupang kum 12-14 inkar zingah mi 31,018-in Covid vaccine an la tawh.

IDSP tarlan danin, January 16, 2021 aṭanga May 6, 2022 thlengin Mizoramah mi 8,50,283-in Covid-19 vaccine an la tawh a, chu'ng zinga mi 6,88,417 chuan second dose an la tawh.

Mizoram sorkarin hmun a buatsaih hrang hrangah Covid vaccine dose 15,75,559 pek a ni tawh a, dose khatna 8,48,068, dose hnihna 6,86,157 leh precautionary dose 41,334 a ni. Private facility-ah dose 4,678 pek a ni tawh a, dose khatna 2,215, dose hnihna 2,260 leh precautionary dose 203 a ni.

Naupang kum 12-14 inkar mi 31,018-in vaccine an la tawh a, chu'ng mite hnena vaccine pek tawh zat chu dose 37,016 a ni. Kum 18-44 inkar mi 4,71,018 hnenah dose 8,46,963 pek tawh a ni tawh a, vaccine laknaa hlawm ṭhen zingah la an tamna ber a ni. Hetih lai hian, mi 41,537-in precautionary dose an la tawh bawk.